पुणे : महानगरपालिकेकडून नवीन विमानतळ रस्त्यावर मलनिस्सारण वाहिनी जोडण्याचे काम केले जाणार आहे. त्यासाठी 11 ते 17 मार्च या कालावधीमध्ये दोराबजी मॉल ते सिंबायोसिस महाविद्यालय दरम्यानचा नवीन विमानतळ रस्ता वाहतुकीसाठी बंद ठेवण्यात येणार आहे. त्यामुळे वाहनचालकांनी पर्यायी मार्गाचा वापर करावा, असे आवाहन वाहतुक पोलिस उपायुक्त राहूल श्रीरामे यांनी केले आहे.(Changes traffic on Pune New Airport Road)

लोहगाव विमानतळाकडून नवीन विमानतळ रस्त्याकडे येणारी वाहतूक सिंबायोसिस चौकातून वळविण्यात येणार आहे. त्यामुळे वाहनचालकांनी मिथिला सोसायटीसमोरून उजवीकडे वळून म्हाडा कॉलनीमार्गे गंगापूरम चौकातून उजवीकडे वळून नवीन विमानतळ रस्त्यावरून इच्छितस्थळी जावे. नवीन विमानतळ रस्त्यावरून विमानतळाकडे जाणारी वाहतूक दोराबजी मॉल दोराबजी चौकातून उजवीकडे वळविण्यात येणार आहे. वाहनचालकांनी गंगापूरम चौक, म्हाडा कॉलनीमार्गे पुढे जाऊन रोहन मिथीला सोसायटी, सिंबायोसिस महाविद्यालय चौकात जावे. तेथून उजवीकडे वळून नवीन विमानतळ रस्त्याने इच्छित स्थळी जावे, असे आवाहन वाहतुक पोलिसांनी केले आहे.