पुण्यात काल मुख्यमंत्री एकनाथ शिंदे आणि आदित्य ठाकरे दोघेही दौऱ्यावर होते. यावेळी काही शिवसैनिकांनी गद्दार गद्दार म्हणत शिंदे गटातल्या उदय सामंत यांच्यावर हल्ला केला. या हल्ल्यात उदय सामंत यांच्या गाडीचं नुकसान झालं आहे. यावरुनच आता मुख्यमंत्री शिंदेंनी सुनावलं आहे.

मुख्यमंत्री एकनाथ शिंदे यांनी या हल्ल्याचा निषेध केला असून ही मर्दुमकी नाही, अशी प्रतिक्रिया शिंदे यांनी दिली आहे. मुख्यमंत्री शिंदे म्हणाले, "उदय सामंत यांच्यावर भ्याड हल्ला झाला आहे. ही मर्दुमकी नाही. कोणी कायदा,सुव्यवस्था बिघडवण्याचं काम करत असेल, तर पोलीस कारवाई करतायत. कोणी आतातायी पणा केली, तरी पोलीस कारवाई करतील. गुन्हा झाल्यावर पोलिसांना सांगावं लागत नाही की गुन्हा दाखल करा. जे कोणी चिथावणी खोर भाषण करत असेल तर पोलीस कारवाई करतील. कायदा सुव्यवस्था पोलीस पाहतील,प्रक्षोभित भाषण कोणी करत असेल तर पोलीस कारवाई करतील. मला राज्यात शांतता हवी आहे".

एकनाथ शिंदे यांच्या गटातील आमदार उदय सामंत यांच्या गाडीवर पुण्यात मंगळवारी हल्ला झाल्याची घटना घडली होती. कात्रज परिसरात हा हल्ला झाला होता. या हल्ल्याप्रकरणात पोलिसांनी कारवाई करत शिवसेना नेते आदित्य ठाकरे यांच्या 'शिवसंवाद' सभेच्या आयोजकांसह पाच जणांना अटक करण्यात आली आहे.