पुणे : कधी एलियन (परग्रहवासी) दिसले म्हणून तर, कधी थेट चंद्रावर जमीन खरेदी करण्यासारख्या प्रकरणामध्ये पुणेकर आघाडीवर आहेत. त्यातच आता पहाटेच्यावेळी कोंबडा आरवल्यामुळे दररोज झोपमोड होते, म्हणून एका महिलेने चक्क कोंबडयाविरुद्ध थेट पोलिस ठाण्यात तक्रार केली आहे. हा प्रकार पुण्यातील सोमवार पेठेतील समर्थ पोलिस ठाण्याच्या हद्दीत घडला आहे. 

पुण्यात 'एलियन' असल्याचा दावा; पीएमओकडून दखल (व्हिडिओ)

पहाटेच्यावेळी कोंबडा आरवल्यामुळे आपली दररोज झोपमोड होते. म्हणून एका महिलेने कोंबडयाविरुद्ध थेट पोलिस ठाण्यात तक्रार दिली आहे. तक्रारदार महिलेचे नाव अद्याप उघड झाले नाही. अगोदरच पोलिस ठाण्याच्या हद्दीत गंभीर गुन्हे घडण्याच्या घटना सतत घडत आहेत. ते गुन्हे उघडकीस आणण्यात पोलिसांचा जास्त वेळ जात आहे. त्यात महिलेने कोंबडयाविरुद्ध तक्रार केली, त्यामुळे कोंबडयाविरुद्ध किंवा त्याच्या मालकाविरुद्ध कुठला गुन्हा दाखल करायचा? काय कारवाई करायची? या प्रश्नामध्ये पोलिस अडकले आहेत. "कोंबडयामुळे झोपमोड होत असल्यामुळे आमच्याकडे तक्रार दाखल आहे." असे समर्थ पोलिस ठाण्याचे पोलिस निरीक्षक बालकृष्ण कदम यांनी स्पष्ट केले आहे.

'कोणी जमीन घेता का जमीन, चंद्रावरील जमीन'

काही महिन्यांपूर्वी कोथरुडमधील एका नागरिकाला एलियन दिसला होता, त्याची दखल खुद्द पंतप्रधान कार्यालयाने घेऊन पुणे पोलिसांना "त्या" एलियन प्रकरणाचा तपास करण्याच्या सूचना दिल्या होत्या. तर दुसऱ्या एका प्रकरणात एका गृहीणीने चक्क 30-40 लाख रुपये खर्च करून चंद्रवर जमीन खरेदी केली होती. या प्रकरणत फसवणूक केल्यामुळे महिलेने पोलिसांकडे तक्रार केली होती. त्यामुळे पोलिसांची डोकेदुखी वाढली होती. या दोन प्रकरणानंतर आता एक तिसरी घटना पुण्यात घडली आहे.