पुणे : कोरोनामुळे लग्नात उपस्थितीवर राज्य सरकारने घातलेली बंधने वधू- वरांच्या पथ्यावर पडत असून अनेकांनी वाचलेल्या पैशांतून भविष्यासाठी तरतूद केली आहे. सोने, शेअर्स किंवा व्यवसाय-धंद्यात त्यांनी पैसे गुंतविण्यास सुरवात केली आहे. लग्न समारंभात ५० लोकांपेक्षा जास्त उपस्थिती नको, असा राज्य सरकारचा सध्याचा नियम आहे. होणारे लग्नसमारंभ या नियमानुसारच होत आहे. जास्त उपस्थिती असल्यास संबंधितांवर पोलिसांकडून कारवाई होत आहे. त्यामुळे उपस्थितीबाबतचा नियम काटेकोरपणे पाळला जात असल्याचे सध्याचे चित्र आहे. तसेच त्यामुळे लग्नात होणाऱ्या खर्चावरही आता बंधने आली आहेत. एरवी लग्नासाठी लाखो रुपये खर्च होतो. परंतु, आता साधेपणाने लग्न समारंभ करण्यावर भर दिला जात आहे. मंडप किंवा मंगल कार्यालय, केटरिंग, वाहनांचा ताफा किंवा वाजंत्री (डिजे) या खर्चीक गोष्टी नागरिक टाळू लागले आहे. मात्र, सोने व मर्यादित कपडे खरेदीत मात्र बदल झालेला नाही. कोणत्याही प्रकारचा मानापमान ,रुसवाफुगवी न होता प्रत्येक जण सांभाळून घेत असल्याचेही दिसून येत आहे. लग्नासाठीचा टळलेला खर्च आता नवविवाहित जोडपी मुदत ठेवींध्ये गुंतवत आहेत. भविष्य निर्वाह निधी किंवा म्युचुअल फंडमध्येही गुंतवविले जात आहेत. तर काहींनी नोकरी किंवा व्यवसायासाठी त्या खर्चाचे नियोजन केले आहे.

नवविवाहिता अंकिता जाधव म्हणाल्या, ''निर्बंध शिथिल झाल्यावर डिसेंबरमध्ये माझे लग्न झाले. आम्ही दोघेही नुकतेच जॉब ला लागलो, त्यामुळे नोंदणी पद्धतीने लग्न केले. अशा पद्धतीच्या लग्नामुळे आम्ही खुश आहोत. कारण बराच खर्च टळला. ते पैसे भविष्यासाठी आम्ही ठेवले आहेत.'' मात्र जुनी पद्धत रुढ व्हायला नको, असेही त्यांनी सांगितले. नुकताच विवाह झालेले भूषण खैरनार म्हणाले, ‘‘माझे लग्न ७ जूनला झाले. लग्न समारंभपूर्वक करण्याची इच्छा होती, परंतु निर्बंधामुळे साधेपणाने केले. ,आहे त्यात छान करण्याचा प्रयत्न सासरकडून आलेल्या पैशांत बायकोचे राहिलेले शिक्षण पूर्ण करण्यासाठी मुदतठेव केली आहे.

नवविवाहिता अनित जाधव म्हणाल्या, ‘‘आम्ही २७ मे रोजी नोंदणी पद्धतीने लग्न केले. त्यासाठी केवळ अडीच हजार रुपये खर्च आला. अनावश्यक खर्च टळला. दोघांच्या पैशात बचत झाली. भविष्यासाठी वाचलेले पैसे आम्ही व्यवसायात गुंतवले आहेत. विकास मांजरे म्हणाले, ‘‘२४ फेब्रुवारीला माझे गावाकडे लग्न झाले. लग्न झाले. छोटा मंडप टाकून लग्न दारापुढे लावले. एकूण ६० हजार खर्च झाला. बाकी गोष्टींवरचा खर्च वाचला. लग्न सुटसुटीत झाले. वाचलेले पैसे आता पुढच्या आयुष्यासाठी उपयोगी पडतील.’’