भोर (पुणे) : भोर तालुक्‍यातील कोरोनाच्या रुग्णांमध्ये वाढ होण्यास पुन्हा सुरुवात झाली असून, रविवारी (ता. 24) तीन रुग्णांशिवाय सोमवारी (ता. 25) दुपारी आणखी दोन रुग्णांचे अहवाल पॉझिटिव्ह आले आहेत. यामध्ये बाजारवाडी ग्रामपंचायतीमधील मानकरवाडीतील तरुणाचा आणि रायरी ग्रामपंचायतीमधील रेणुसेवाडीतील एका तरुणाचा समावेश आहे. त्यामुळे तालुक्‍यातील रुग्णांची संख्या सहा झाली आहे. 

सख्खे भाऊ शेततळ्याजवळ खेळत होते अन्‌... 

मानकरवाडी येथील तरुण हा काही दिवसांपूर्वी मुंबईहून गावी आला होता. तेव्हापासून तो होम क्वारंटाइन होता. तर रेणुसेवाडी येथील तरुण हा रायरी येथील कोरोनाग्रस्त कुटुंबाच्या सोबत मुंबईहून आला होता. रायरी येथील दोन मुलींसह पती- पत्नी कोरोनाबाधित झाले आहेत. तपासणीसाठी पाठविलेले बसरापूर येथील एक आणि रायरीतील आणखी तिघांचे अहवाल निगेटिव्ह आले आहेत. यापूर्वी नेरे येथील दोन आणि नसरापूर येथील दोन जण कोरोनाच्या आजारातून पूर्णपणे बरे झाले आहेत. 

इंद्रायणीच्या घाटावर गुंडांची दहशत

भोर तालुक्‍यात दोन दिवसात कोरोनाचे पाच रुग्ण आढळल्याने प्रशासनाची धावपळ सुरू झाली. तहसीलदार अजित पाटील, तालुका वैद्यकीय अधिकारी सूर्यकांत कऱ्हाळे, गटविकास अधिकारी विशाल तनपुरे यांनी मानकरवाडीस भेट देवून कोरोनाच्या उपाययोजनांची पाहणी केली. दोन्ही गावांमधील कोरोनाग्रस्तांच्या संपर्कात आलेल्यांना संस्था क्वारंटाइन करण्यासाठी आणि आवश्‍यक त्या रुग्णांना कोविड केअर सेंटरमध्ये दाखल करण्याचे काम सायंकाळपर्यंत सुरू होते.

पुणेकरांनो, घरातच बसा...सूर्य ओकतोय आग   

काळजी घेण्याचे आवाहन 
भोर तालुक्‍यातील कोरोनाग्रस्तांचे प्रमाण वाढत असल्यामुळे प्रशासनाबरोबर नागरिकांनी काळजी घेण्याचे आवाहन प्रांताधिकारी राजेंद्रकुमार जाधव यांनी केले. बाहेरून आलेल्यांच्या संपर्कात कोणीही न राहता त्यांना संस्था क्वारंटाइन विभागात पाठवावे. गावपातळीवरील ग्रामसेवक, तलाठी, आशा व अंगणवाडी कर्मचारी आणि शिक्षक आदींसमवेत गावातील पोलिस पाटील, सरपंच व ग्रामपंचायती सदस्यांसह ग्रामसुरक्षा दलातील कार्यकर्त्यांनी सरकारने दिलेल्या नियमांचे पालन करून कोरोनाचा प्रसार रोखण्यासाठी सहकार्य करावे, असेही राजेंद्रकुमार जाधव यांनी सांगितले.