बारामती : गेल्या 33 दिवसांपासून बारामती शहरात एकही कोरोना रुग्ण सापडलेला नसल्याने बारामतीतील कोरोना रुग्णांची साखळी तोडण्यात प्रशासनाला यश आले आहे. या पार्श्वभूमीवर बारामतीतील दैनंदिन व्यवहार सुरळीत व्हावेत व व्यापारपेठ पूर्ववत सुरु करावी अशी मागणी होऊ लागली आहे. 

- आणखी वाचा - बारामतीकरांचे सोने खरेदीचे आकडे वाचून थक्क व्हाल

दरम्यान, बारामतीत 14 एप्रिल रोजी कोरोनाबाधित रुग्ण सापडला होता. त्या नंतर बारामती शहरात एकही रुग्ण आढळलेला नाही. लॉकडाऊनच्या प्रभावी अंमलबजावणीसह बारामती पॅटर्न मुळे बारामतीतील कोरोनाची साखळी तोडण्यात यश मिळाल्याचे आता सिध्द झाले आहे. 

बारामतीत शिथीलता दिल्यानंतर आता बाहेरून बारामतीत येणा-यांचे प्रमाण वेगाने वाढू लागल्याने प्रशासनात अस्वस्थता आहे. असे असले तरी आता व्यापारचक्र अधिक वेगाने फिरणे गरजेचे असल्याने बारामतीत या आठवड्यात दोन दिवसांऐवजी चार दिवस व संध्याकाळी सहा ऐवजी रात्री आठपर्यंत दुकाने सुरु ठेवण्यास परवानगी द्यावी, अशी व्यापा-यांची मागणी आहे. 

- 'फुकट काम करा, नाहीतर राजीनामा द्या'; पुण्यातील आयटी कंपनीचा प्रताप!

जवळपास दोन महिने लॉकडाऊनमुळे व्यापार ठप्प झाला होता, त्या मुळे बाजारपेठ सुरु झाल्यानंतर खरेदीसाठी लोकांची झुंबड उडाली होती, दोनच दिवस तेही संध्याकाळी सहा वाजेपर्यंतच दुकाने सुरु राहणार असल्याने गर्दी वाढली. दुकाने सुरु राहण्याचा कालावधी चार दिवसांचा व वेळ आठपर्यंत केल्यास गर्दीचे विभाजन होऊन दुकानदारांचीही सोय होईल, असे दुकानदारांचे म्हणणे आहे. 

- वाचून धक्का बसेल : तुमची मुलं घरात इंटरनेटवर काय पाहतात बघा!

दैनंदिन व्यवहार जोपर्यंत सुरळीत सुरु होत नाहीत, तो पर्यंत बारामतीच्या अर्थकारणाला गती येणार नाही, त्या मुळे आता या आठवड्यापासून चार दिवस व रात्री आठ पर्यंत दुकाने सुरु ठेवण्यास प्रशासनाने मान्यता द्यावी अशी व्यापा-यांची मागणी आहे. जास्त दिवस व वेळ दुकाने सुरु राहीली तर लोक त्यांच्या सवडीनुसार येऊन खरेदी करतील व ठराविक वेळेतील गर्दीचा ताणही कमी होईल, असे व्यापा-यांनी सांगितले.