राजगुरूनगर (पुणे) : खेड तालुक्यातील प्रतिबंधित क्षेत्रांच्या निर्णयाबाबत सगळासावळा गोंधळ असून, कालच्या तहसीलदारांच्या प्रतिबंधित क्षेत्रांच्या मुदतवाढीच्या आदेशाच्या उलटी भूमिका आमदार दिलीप मोहिते समर्थकांनी आज सोशल मीडियामधून घेतली आणि व्यावसायिकांना दुकाने उघडण्याचे आवाहन केले. त्यामुळे लोकांमध्ये संभ्रम निर्माण झाला. काहींनी दुकाने उघडली, तर काहींनी बंद ठेवली. 

जुन्नर तालुक्यातील कोरोनाग्रस्तांची चिंता कमी होणार

खेडच्या तहसीलदारांनी तालुक्यातील तीन नगरपरिषदा आणि १८ गावांची प्रतिबंधित क्षेत्रे (कंटेंनमेंट झोन) म्हणून मुदत २८ जुलैपर्यंत वाढविण्यात आल्याचा आदेश काल काढला. त्या आदेशाची माहिती लोकांना देण्याच्या सूचना त्यांनी खालच्या अधिकाऱ्यांना दिल्या होत्या. पण, लोकांपर्यंत माहिती पोहचलीच नाही. त्यामुळे दुकानदारांनी साफसफाई करून दुकाने उघडण्याची तयारी केली. संध्याकाळी तहसीलदारांचा आदेश सोशल मिडियावर फिरू लागल्यावर दुकानदारांनी आमदार दिलीप मोहिते यांच्याकडे मुदतवाढीबाबत तक्रारी केल्या. त्यावर मोहिते यांनी जिल्हाधिकाऱ्यांशी चर्चा केली. त्यानंतर खेडचे प्रभारी उपविभागीय अधिकारी सुनील गाढे यांनी, सरसकट प्रतिबंधित क्षेत्राऐवजी ज्या भागात रूग्ण आहेत, तो परिसर सूक्ष्म प्रतिबंधित क्षेत्र (मायक्रो कंटेनमेंट झोन) करण्याची कार्यवाही करण्याचे आश्वासन दिले, असे आमदारांच्या वतीने कार्यकर्त्यांकडून सांगण्यात आले. त्यामुळे आज काही जणांनी दुकाने उघडली. तर काही जणांनी बंद ठेवली. 

आता शुभमंगल सावधान म्हणा वीस लोकांमध्येच

खेड तालुक्यात कोरोनासंदर्भातील उपाययोजनांबाबत आणि निर्णयांबाबत सातत्याने संदिग्धता आणि धरसोडपणा केला जात आहे. तालुक्यात कोरोनाबधितांची संख्या वाढत असून, लोकप्रतिनिधी आणि प्रशासनात संवाद नसल्याचे पाहावयास मिळत आहे. दरम्यान, आज आपण सूक्ष्म प्रतिबंधित क्षेत्रांबाबतचा आदेश काढू, असे गाढे यांनी सांगितले.