घोरपडी (पुणे) : बी. टी. कवडे रस्ता व परिसरात कोरोनाचा प्रादुर्भाव वाढत असल्यामुळे पुणे महानगरपालिकेच्या वतीने संपूर्ण बी. टी. कवडे रस्ता व परिसर सील करण्यात येणार आहे. यासंदर्भात पुणे महानगरपालिकेचे आयुक्त शेखर गायकवाड यांनी आज असे पत्रक प्रसिद्ध केले आहे. त्यानुसार हा परिसर २६ जून पासून ३० पर्यंत पूर्णपणे सील करण्यात येणार आहे. बुधवारी प्रसिद्ध केलेल्या सूचनेनुसार बी. टी. कवडे रस्ता व परिसर सूक्ष्म प्रतिबंधित क्षेत्र म्हणून घोषित करण्यात आले आहे. यामध्ये भारत फोर्स कंपनी ते भीमनगर परिसर, श्रीनाथ नगर, बालाजी नगर, फैलवाली चाळ, विकासनगर, पंचशील नगर, संपूर्ण बी. टी. कवडे रस्ता आणि घोरपडी गावातील मनपाच्या हद्दीतील परिसर पाच दिवस बंद ठेवण्यात येणार आहे.

तीस दिवसांच्या बाळाची झुंज यशस्वी; ससूनमध्ये उपचार

या दरम्यान फक्त दूध विक्री, मेडिकल आणि दवाखाने सुरू राहतील. सकाळी सात ते नऊ पर्यंत दूध विक्री करता येईल. मेडिकल व दवाखाना सकाळी नऊ ते सायंकाळी सात वाजेपर्यंत खुले ठेवण्याची परवानगी देण्यात आली आहे. तसेच इतर सर्व दुकाने बंद ठेवण्याचा आदेश आयुक्तांनी दिला आहे. परिसरात कोरोनाचे रुग्ण वाढत असल्यामुळे मंगळवारी साखर आयुक्त सौरभ राव आणि इतर अधिकारी यांनी या परिसराची पाहणी केली. त्यानुसार परिसरात नागरिक नियमांचे पालन करत नसल्याचे लक्षात आल्यावर संपूर्ण परिसर सील करण्याचा निर्णय घेण्यात आला आहे. 

निरोगी आयुष्यासाठी योगा आवश्यक; जीवनशैलीवर सकारात्मक परिणाम

कोरोनाचा प्रादुर्भाव रोखण्यासाठी आयुक्तांच्या सूचनेनुसार पाच दिवस संपूर्ण परिसर सील करण्यात येणार आहे. नागरिकांना गरजेच्या वस्तू व साहित्य खरेदी करण्यासाठी दोन दिवस देण्यात आले आहेत. त्यानुसार नागरिकांनी गैरसोय टाळण्यासाठी भाजीपाला, फळे  आणि किराणा समान याची खरेदी करून ठेवावी.

-दयानंद सोनकांबळे, सह आयुक्त, ढोले क्षेत्रीय कार्यालय