कळस : इंदापूर तालुक्यातील कळस - काझड वनालगत चिंकारा जातीच्या हरणाची शिकार करून पळून जात असताना दोन आरोपींना ताब्यात घेण्यात आले आहे. गस्तीवर असलेल्या वन कर्मचाऱ्यांकडून ही कारवाई करण्यात आली. मृत हरणा समवेत त्यांना ताब्यात घेतले असून त्यांच्याकडे एक बंदूक, सहा जिवंत काडतुसे एक पुंगळी व सर्च लाईट सह मोटार सायकल (क्रमांक एम. एच. 42 ए. व्ही. 2111) आदी मुद्देमाल ताब्यात घेण्यात आला आहे.त्यांच्यावर वन्यजीव अधिनियम 1972 अन्वये गुन्हा नोंदविण्यात आला आहे.

तालुक्यातील काझड फॉरेस्ट गट नंबर 345 व कळस फॉरेस्ट गट नंबर 40 लगत बोरी- अकोले फिरंगाई मंदिर रस्त्यावर रात्री गस्त घालत होते. आरोपी महेश जंगलु माने (वय 40, रा. सणसर ता. इंदापूर) व दत्तात्रेय पोपट पवार (वय 42, रा. बोरी, ता. इंदापूर) हे दोघेजण चिंकारा जातीच्या हरणाची शिकार करून ते मोटर सायकल वरून घेऊन जात असताना आढळून आले. वन कर्मचाऱ्यांना बघून ते पळून जाण्याच्या प्रयत्नात होते. स्थानिक ग्रामस्थांच्या मदतीने या आरोपींना शिकारीचे साहित्य व शिकार केलेल्या मृत हरणासमवेत ताब्यात घेतले आहे. तालुका वनपरिक्षेत्र अधिकारी राहुल काळे वनपाल अशोक नरोटे वन रक्षक पूजा काटे वनमजूर ज्ञानदेव ससाने आदींनी ही कारवाई केली.

इंदापूर तालुक्यातील वन्य प्राण्यांची शिकार होत असल्याची या महिन्यातील ही दुसरी घटना उघडकीस आली आहे. 1 मे च्या रात्री खोकड प्राण्याची शिकार केल्याच्या आरोपाखाली कुंभारगाव येथील दोन आरोपी ताब्यात घेतले होते. यानंतर आज रात्रीचा घटनेने तालुक्यातील वन्य प्राणी असुरक्षित असल्याचे बोलले जात आहे.

वनगुन्हा करणार्यांची गय केली जाणार नाही. आम्ही रात्रीची गस्त वाढवली आहे. खबर्यांची संख्या वाढवली आहे. आरोपींना अटक करून न्यायालयात हजर केले जाणार आहे. त्यांनी शिकार केलेल्या हरणाचे मांस कुठे विक्री करणार होते याचा तपास करून अन्य काही आरोपी हाती लागण्याची शक्यता असल्याचे तालुका वनपरिक्षेत्र अधिकारी राहुल काळे यांनी सांगितले.

पुण्याच्या बातम्या वाचण्यासाठी क्लिक करा