नारायणगाव (पुणे) : जुन्नर तालुक्यातील नारायणगाव येथे पुणे- नाशिक महामार्गावर चालक व क्लिनरला धमकी देऊन मालट्रकमधील टीएमटी बारची (स्टील) चोरी करणाऱ्या जुन्नर तालुक्यातील चार जणांच्या टोळीला नारायणगाव पोलिसांनी आज पहाटे रंगेहाथ पकडले असून, आरोपींना अटक केली आहे, अशी माहिती नारायणगाव पोलिस स्टेशनचे सहायक पोलिस निरीक्षक  दत्तात्रेय गुंड यांनी दिली.

खडकवासला धरणातून पुन्हा विसर्ग वाढवला

या प्रकरणी अक्षय बबन महांबरे, राहुल धोंडिभाऊ बेल्हेकर (दोघेही रा. साळवाडी बोरी खुर्द, ता. जुन्नर), आदेश बाबाजी भोर, पंकज गोपीनाथ भोर (दोघेही रा. चौदा नंबर, ता. जुन्नर) यांना अटक केली आहे. अनिल गोविंद कांबळे यांच्या माउली ट्रान्सपोर्टच्या  मालट्रकमधून दिंडोरी- नाशिक ते पुणे अशी टीएमटी (स्टील) मालाची वाहतुक केली जाते. आज पहाटे एक वाजण्याच्या सुमारास आरोपी अक्षय महांबरे व राहुल बेल्हेकर यांनी पुणे- नाशिक महामार्गावर चौदा नंबर येथे ट्रक थांबवली. चालक व क्लिनर यांना धमकी देऊन ट्रकमधील स्टीलची चोरी करण्यास सुरवात केली. 

छोट्या आकाराचा सुखकर्ता ठरले मोठ्या आकाराचा विघ्नहर्ता

दरम्यान, मिळालेल्या माहितीनुसार पोलिस घटनास्थळी दाखल झाले. दोन्ही आरोपींना पोलिसांनी अटक केली. त्यानंतर पहाटे दोन वाजण्याच्या सुमारास वारुळवाडीजवळील रिलायन्स पेट्रोलपंपाजवळ आरोपी आदेश भोर, पंकज भोर यांनी चालक व क्लीनर यांना धमकी देऊन माउली ट्रान्सपोर्टची दुसरी ट्रक थांबवली. ट्रकमधील स्टीलची चोरी करण्यास सुरवात केली. याबाबतची माहिती मालक कांबळे यांनी नारायणगाव पोलिसांना दिली. पोलिस तातडीने घटनास्थळी दाखल झाले. पोलिसांचा सुगावा लागताच पळून जात असलेल्या दोन्ही आरोपींना पोलिसांनी अटक केली. स्टीलची चोरी करून त्याची विक्री भंगार व्यावसायिकांना करत असल्याची माहिती आरोपींनी पोलिसांना दिली.