मंचर (पुणे) : रक्ताच्या नात्यापेक्षा माणुसकीचे नाते श्रेष्ठ असते. याची प्रचिती मंचरकरांना आली आहे. दोन संशयित कोरोनाबाधितांवर नातेवाईकांनी अंत्यसंस्कार करण्यास असमर्थता दर्शविली. सरपंच दत्ता गांजाळे यांनी पुढाकार घेऊन बुधवारी (ता. २९) रात्री शेजारच्या तालुक्यातील दोन व्यक्तीवर मंचरला तपनेश्वर भूमीत अंत्यसंस्कार केले. ”माणसा माणसा जागा हो, माणुसकीचा धागा हो” या संदेशाची अंबलबजावणी येथे झाल्याचे पहावयास मिळाले.

खडकवासला प्रकल्पात निम्म्याहून कमी साठा

मंचर उपजिल्हा रुग्णालयात अत्यावस्थेत दाखल झालेल्या दोन कोरोना संशयित रुग्णांचा उपचारादरम्यान मृत्यू झाला. डॉक्टरने सरपंच दत्ता गांजाळे यांना ही माहिती मोबाईलद्वारे कळविली. कोरोना योद्धा म्हणून सतत युद्धभूमीवर सेवेत असणारे गांजाळे यांनी रुग्णालयात जाऊन नातेवाइकांशी चर्चा केली. दोन्ही रुग्ण कोरोना संशयित असल्यामुळे त्यांचे  मृतदेह नातेवाईकांच्या ताब्यात शासकीय नियमाप्रमाणे देता येत नसल्याचे डॉक्टरांनी सांगितले. नातेवाईकांनीही आपल्या गावी मृतदेह नेण्यास असमर्थता दर्शविली. मंचरला तपनेश्वर स्मशानभूमीत अंत्यसंस्कार करण्याचे ठरले. सरपंच व त्यांचे सहकारी मित्र यांनी रुग्णवाहिका व अंत्यसंस्काराची तयारी केली. तोपर्यंत एका कुटुंबातील बरेचसे नातेवाईक जमा झाले होते. तर, दुसऱ्या कुटुंबातील त्या मृत्यू झालेल्याचा मुलगा हयात नसल्यामुळे त्यांची मुलगी व सून रुग्णालयात आले होते. दुसऱ्या कुटुंबातील मयत झालेल्या व्यक्तीचा मुलगा सोडून इतर नातेवाईकांनी मृतदेहाला हात लावण्यात असमर्थता दर्शविली. 

बारामतीत कोरोनाचा बारावा बळी

अतिदक्षता विभागातून गांजाळे, रुग्णवाहिका चालक गौरव बारणे व बजरंग दलाचे अक्षय चिखले यांनी मृतदेह ताब्यात घेऊन दोन्ही मृतदेह तपनेश्वर स्मशानभूमीमध्ये नेले. त्यांना आधार देण्यासाठी व अंत्यसंस्कारसाठी पुढे येण्यास नातेवाईक धजावले नाही. पहिल्या मयत व्यक्तीचा मुलगा व पत्नी व दुसऱ्या मयत व्यक्तीची मुलगी व सून सोडून अन्य नातेवाईकांनी स्मशानभूमीच्या बाहेर रस्त्यावरच थांबणे पसंत केले. या अंत्यविधी प्रक्रियेत पोलिस नाईक गणेश डावखर, ग्रामपंचायत कर्मचारी बाळू लोंढे, महेश घोडके, आकाश मोरडे, ऋषिकेश शेटे, राहुल थोरात, शुभम बाणखेले,  जयेश भालेराव, अकिल सय्यद यांचा  सहभाग होता.

पुण्याच्या आणखी बातम्या वाचण्यासाठी येथे क्लिक करा

अंत्यसंस्कार झाल्यानंतर निरोप घेताना एका कुटुंबातील मृत व्यक्तीची मुलगी व सून म्हणाल्या, “आमचे बाबा खरंच भाग्यवान. सरपंच, तुमच्या हातून त्यांना मुखाग्नी मिळाला. त्यांच्या मुलाची जागा तुम्ही आज भरून काढली. रक्ताच्या नात्यापेक्षाही माणुसकीचे नाते निभाविण्याचे काम तुम्ही केले.” हे ऐकून गांजाळे यांना गहिवरून आले होते. त्यांच्या डोळ्याच्या कडाही पाणावल्या.