पुणे : गणेश मंडळांना उत्सवासाठी पाच वर्षांसाठी परवानगी राहील. त्यामुळे मंडळांना दरवर्षी परवानगी घेण्याची गरज नाही. परंतु नवीन गणेश मंडळांना परवानगी घ्यावी लागेल, असे उपमुख्यमंत्री अजित पवार यांनी स्पष्ट केले. गणेशोत्सवात मेट्रोची सेवा रात्री १२ वाजेपर्यंत सुरू ठेवण्याच्या सूचना त्यांनी संबंधित अधिकाऱ्यांना दिल्या.

तसेच, ध्वनिक्षेपकास २३, २४, २६, २७ आणि २८ सप्टेंबर रोजी रात्री १२ वाजेपर्यंत परवानगी राहील, असे जिल्हा प्रशासनाकडून सांगण्यात आले. यंदाच्या गणेशोत्सव नियोजनासाठी शिवाजीनगर पोलिस मुख्यालयात पुणे, पिंपरी चिंचवड शहरातील गणेश मंडळांची बैठक पार पडली. बैठकीस उपमुख्यमंत्री पवार,

पालकमंत्री चंद्रकांत पाटील, आमदार माधुरी मिसाळ, विभागीय आयुक्त सौरभ राव, पोलिस आयुक्त रितेश कुमार, पिंपरी चिंचवडचे पोलिस आयुक्त विनयकुमार चौबे, महापालिका आयुक्त विक्रम कुमार, महामेट्रोचे व्यवस्थापकीय संचालक श्रावण हर्डीकर, जिल्हाधिकारी डॉ. राजेश देशमुख, पिंपरी चिंचवड महापालिका आयुक्त शेखर सिंह आदी उपस्थित होते. या वेळी गणेश मंडळांच्या प्रतिनिधींनी सूचना करीत सकारात्मक चर्चा केली.

पवार म्हणाले, श्रीमंत दगडूशेठ हलवाई गणपती मंडळाने विसर्जन मिरवणुकीत दुपारी चार वाजता सहभागी होण्याचा चांगला निर्णय घेतला आहे. विसर्जन मिरवणूक वेळेत पार पाडण्यासाठी, प्रशासन नियोजन करीत आहे.

मंडळांनीही योग्य प्रतिसाद द्यावा. मंडळांनी वाहतुकीला अडथळा येणार नाही याची दक्षता घ्यावी. गणेश मूर्तीच्या उंचीवर मर्यादा नाही. मात्र मूर्ती विसर्जन करताना उत्सवाचे पावित्र्य जपले जाईल, याकडे लक्ष द्यावे. धनकवडी भागातील मंडळांचा एकत्रित विसर्जन मिरवणुकीचा उपक्रम अनुकरणीय आहे. मानाच्या गणपतींसोबत इतर मंडळांशीही खेळीमेळीचे वातावरण ठेवत त्यांच्या समस्या प्रशासनाने दूर कराव्यात.

पालकमंत्री पाटील म्हणाले, महापालिकेने गणेश मंडळांकडून कमानींसाठी कर आकारू नये. प्रशासनाने गणेश मंडळांच्या समस्या दूर कराव्यात. नियंत्रण मनोरे स्थापित करून नियोजनावर लक्ष ठेवावे. पोलिसमित्रांना प्रशिक्षित करून त्यांची मदत घ्यावी. गणेश मंडळांनी स्वतः नियमावली तयार करून प्रशासनाला सहकार्य करावे. सर्वांनी मिळून उत्सव शांततेत पार पाडावा.

पोलिस सहआयुक्त रामनाथ पोकळे यांनी बैठकीचे प्रास्ताविक केले. गतवर्षी तीन हजार ५६६ गणेश मंडळांची नोंदणी झाली होती. यावर्षीही तेवढ्याच गणेश मंडळांद्वारे गणेशोत्सव साजरा केला जाणार आहे, अशी माहिती त्यांनी दिली. सूत्रसंचालन वाहतूक शाखेचे पोलिस उपायुक्त विजयकुमार मगर यांनी केले.

गणेशोत्सवाची तयारी

• परिमंडळनिहाय व्हाट्सॲप ग्रुप तयार करणार

• वाहतूक नियमन, पार्किंग व्यवस्था, सीसीटीव्ही कॅमेऱ्यांबाबत नियोजन

• वाहनतळांसाठी मैदानांवर अतिरिक्त व्यवस्था

• कडेकोट पोलिस बंदोबस्त तैनात

• दोन्ही महापालिका रस्त्यांवरील उघडे चेंबर्स बंद करणार

• मिरवणूक मार्गांवरील खड्डे बुजवणार

• कोंडी टाळण्यासाठी काही भागात शक्य असल्यास वाहतूक दुतर्फा.