पुणे - सार्वजनिक वाहतूक सेवा सक्षम होण्यासाठी सुरू असलेले प्रयत्न प्रवाशांपर्यंत पोचविण्यासाठी पीएमपीने आयोजित केलेल्या ‘बस डे’ला सोमवारी पुणे आणि पिंपरी चिंचवडमधील नागरिकांनी चांगला प्रतिसाद दिला. नेहमीपेक्षा सुमारे दोन लाख जास्त प्रवाशांनी बसचा वापर केल्यामुळे दोन कोटी रुपये उत्पन्नाचे उद्दिष्ट गाठण्यात पीएमपीला यश आले.
दोन्ही शहरांत बसची संख्या वाढली, तर प्रवासी संख्याही वाढते हे ‘सकाळ’ने १ नोव्हेंबर २०१२ रोजी पुणेकरांच्या सहभागातून राबविलेल्या ‘बस डे’मधून सिद्ध झाले आहे. त्यापासून प्रेरणा घेत पीएमपीने सोमवारी ‘बस डे’ आयोजित केला होता. सुमारे १ हजार ८०७ बस मार्गांवर धावल्या, तर नेहमीपेक्षा जास्त ३०० चालक ड्यूटीवर आले होते. भोसरी, पिंपरी, कात्रज, स्वारगेट, पुलगेट, हडपसर, कोथरूड, बावधन, निगडी, शिवाजीनगर, पुणे स्टेशन आदी स्थानकांवरून प्रवाशांनी अलोट प्रतिसाद दिला. पिंपरी चिंचवडच्या महापौर माई ढोरे यांनीही बसमधून प्रवास करून प्रवाशांना प्रोत्साहन दिले. अनेक आगारांत सोमवारी तेथील कर्मचाऱ्यांनी प्रवाशांचे पुष्पगुच्छ देऊन स्वागत केले.
सोमवारी पहाटे सहा ते दुपारी दोन दरम्यानच्या टप्प्यात सुमारे साडेसात लाख जणांनी प्रवास केला अन् एक कोटी २६ हजार रुपये पीएमपीच्या तिजोरीत जमा झाले. दुपारी दोन ते रात्री अकराच्या दरम्यानही हाच ‘ट्रेंड’ कायम राहिला. दर सोमवारी प्रवाशांची गर्दी वाढते, ही बाब लक्षात घेऊन पीएमपीने ‘बस डे’चे आयोजन केले होते. पीएमपीच्या अध्यक्षा नयना गुंडे, सहव्यवस्थापकीय संचालक अजय चारठणकर यांच्यासह मार्गदर्शनाखाली ‘बस डे’ चे आयोजन केले होते.
पीएमपीमध्ये काही दिवसांपूर्वी नियुक्त झालेले ३०० चालकांचेही प्रशिक्षण आटोपल्यावर त्यांनी ‘बस डे’मध्ये नियुक्ती दिली होती. मनुष्यबळ कमी पडू नये म्हणून पीएमपीने सर्व वाहक, चालकांच्या रजा, साप्ताहिक सुट्या रद्द केल्या होत्या.
‘बस डे’ला मिळालेल्या प्रतिसादामुळे कर्मचाऱ्यांचा हुरूप वाढला आहे. पीएमपीने दोन कोटी रुपये उत्पन्नाचे उद्दिष्ट गाठून सुमारे १४ लाख प्रवाशांची वाहतूक करू शकते, हे सिद्ध झाले आहे. त्यामुळे पुढील काळात अधिक जोमाने प्रयत्न करून अशी कामगिरी कायम करण्याचे आमचे उद्दिष्ट आहे. दरमहा ‘बस डे’ साजरा करण्याचा आमचा प्रयत्न असेल. प्रवाशांनी दिलेल्या प्रतिसादाबद्दल पीएमपीकडून मी आभार मानतो.
- अनंत वाघमारे, वाहतूक व्यवस्थापक, पीएमपी
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.