गराडे (पुणे) : छत्रपती संभाजी महाराज यांचे जन्मस्थळ असलेल्या किल्ले पुरंदरवर संभाजी महाराज यांच्या पुतळ्यास जयंतीनिमित्त पुष्पहार अर्पण करण्यात आला. मराठा सेवा संघ- संभाजी ब्रिगेड, पुणे जिल्हा परिषद व पंचायत समिती पुरंदर यांच्या वतीने भव्यदिव्य सोहळा रद्द करून प्रातिनिधिक स्वरूपात अभिवादन करण्यात आले. 

छत्रपती संभाजी महाराज यांना तुळापूर ग्रामस्थांकडून अशा प्रकारे अभिवादन

यावेळी आमदार संजय जगताप, पुरंदर पंचायत समितीच्या सभापती नलिनी लोळे, प्रांताधिकारी प्रमोद गायकवाड, तहसीलदार रूपाली सरनोबत, संभाजी ब्रिगेडचे जिल्हाध्यक्ष अजयसिंह सावंत, प्रशांत पाटणे यांच्या हस्ते संभाजी महाराज यांच्या पुतळ्यास पुष्पहार अर्पण करण्यात आला. पुरंदरेश्वराच्या शिवालयात पूजा करून अभिवादन करण्यात आले. कोरोनाच्या पार्श्वभूमीवर गडावर कडेकोट बंदोबस्त होता. 

पुणे जिल्ह्यात पाऊस कशी उडवत आहे धांदल...  

या वेळी जिल्हा परिषद सदस्य दत्तात्रेय झुरंगे, दिलीप यादव, सासवडचे पोलिस निरीक्षक डी. एस. हाके, गटविकास अधिकारी मिलिंद मोरे, गटशिक्षणाधिकारी मोहन गायकवाड, पानवडीचे सरपंच हरिभाऊ लोळे, सागर जगताप, संतोष हगवणे, आनंद जंगम, गणेश जगताप, केंद्रप्रमुख राजेंद्र जगताप, शिक्षक नेते संदीप कदम, संजय लवांडे, नंदकुमार चव्हाण, राजाभाऊ जगताप, शांताराम कावडे आदी उपस्थित होते. लॉकडाउनच्या काळात या कार्यक्रमाचे यशस्वी आयोजन व संयोजन पुरंदरच्या गटशिक्षणाधिकारी मोहन गायकवाड यांच्या मार्गदर्शनाखाली शिक्षण विभागाने केले. 

पाळणा, छबिना, पालखी सोहळा, मर्दानी खेळ, चित्त थरारक कसरती, शिवकालीन शस्त्रांचे प्रदर्शन, नाणी प्रदर्शन, पोवाडे, व्याख्यान अशा भरगच्च कार्यक्रमाचे दरवर्षी आयोजन केले जाते. मात्र, यंदा कोरोनामुळे सर्व प्रकारचे धार्मिक, राजकीय, सामाजिक सोहळे रद्द करण्यात आले होते. दरवर्षी हजारो लाखो शंभूभक्त गडावर जयंतीच्या निमित्ताने येत असतात. त्यामुळे गड गर्दीने फुलून गेलेला असतो. मात्र, या वर्षी कोरोनाच्या सावटामुळे शंभूभक्तांची निराशा झाली. 

धर्मवीर स्वराज्य रक्षक छत्रपती संभाजी महाराज यांचे जीवन व त्यांनी केलेला संघर्ष, याचा अभ्यास शंभुभक्तांनी व तरुणांनी केला पाहिजे. संभाजी महाराज यांचे विचार सर्वांना प्रेरणादायी आहेत. 
- संजय जगताप, आमदार