आळंदी (पुणे) :  कोरोनाच्या पार्श्वभूमिवर आळंदी ते मरकळ इंद्रायणी नदीत गणेश विसर्जनास संपूर्ण अकरा दिवस बंदी आहे. गणेशोत्सवाच्या पार्श्वभूमिवर आळंदी पालिका आणि पोलिसांनी इंद्रायणी घाटावरील बंद पोलिस चौकी पुन्हा सुरू केली. नदीपात्रात गणेश विसर्जनाचा कोणी प्रयत्न केला तर त्यावर कायदेशीर कारवाई केली जाणार असल्याने गणेशभक्तांनी आता घरामध्येच पर्यायी व्यवस्था करून गणेश विसर्जन करण्याचे आवाहन मुख्याधिकारी अंकूश जाधव आणि वरिष्ठ पोलिस निरिक्षक रविंद्र चौधऱ यांनी केले.

बारामतीतील अधिकारी माध्यमांना माहिती देण्यास करताहेत टाळाटाळ

याबाबत अधिक माहिती देताना जाधव आणि चौधर यांनी सांगितले की, कोरोनाची साथ सध्या वेगाने पसरत असून आळंदी शहरात रोज रूग्ण आढळत आहेत. त्यातच दिघी, च-होली, वडमुखवाडी, मोशी, डुडूळगाव आणि आळंदी लगतच्या गावांमधेही कोरोनाच्या रूग्णांमधे सातत्याने वाढ होत आहे. परिणामी गणेशोत्सवाच्या काळात या भागातून मोठ्या प्रमाणावर गर्दी करून गणेशभक्त गणेश विसर्जनासाठी आळंदीतील इंद्रायणी काठी गर्दी करत आहेत. कोरोनाचा प्रसार रोखण्यासाठी आळंदी पालिका आणि पोलिसांनी पाऊल उचलले आहे. याबाबत नुकतेच पिंपरी पोलिस मुख्यालयात पोलिस आयुक्त संदिप बिष्णोई यांच्या अध्यक्षतेखाली बैठक झाली. यामधेही विसर्जन बंदीचा निर्णय घेतला.

 Video:गणेशोत्सवासाठी पुणे पोलिसांचा विशेष लघुपट; तुम्ही पाहिला का?

दरम्यान आळंदीत इंद्रायणी काठी आज सकाळपासूनच बॅरिकेड्स लावण्याचे काम सुरू आहे. पोलिस उपनिरिक्षक अजय लोहेकर आणि त्यांच्यासोबत सहा कर्मचारी नेमले आहेत. पालिकेचे सहा कर्मचारी त्यांच्यासोबत दिले. पालिकेने जनजागृतीसाठी शहरात तसेच दिघी मॅक्झिन भोसरी फाटा, डुडुळगाव चौक, धानोरे फाटा या ठिकाणीही फलक लावले आहेत. इंद्रायणी घाटावर येणाऱ्या सर्व रस्त्यांवर नदीच्या बाजूने बॅरिकेड्स लावले जाणार आहेत. कुणी नदीपात्रात गणेश विसर्जनाचा प्रयत्न केला तर कायदेशीर कारवाई केली जाणार आहे. नागरिकांनी प्लॅस्टर ऑफ पॅरिसचे गणपती विघटन होण्यासाठी पाण्यामधे सोडीअम बाय कार्बोनेटचा वापर करावा असे आवाहन पालिका आणि पोलिस प्रशासनाकडून केले.