पौड : मुळशी तालुक्यातील कोरोनाबाधितांच्या उपचारासाठी पौ ड येथील ग्रामीण रूग्णालयात 30 तर बावधनला 40 असे मिळून 70 आँक्सिजन बेड जलद गतीने तयार करण्यात येणार असल्याची माहिती आमदार संग्राम थोपटे व मावळ-मुळशीचे प्रांतधिकारी संदेश शिर्के यांनी दिली. आमदार थोपटे यांनी तालुक्यातील कोरोना परिस्थितीचा आढावा तहसिलदार कार्यालयामध्ये घेतला.

यावेळी संदेश शिर्के, तहसिलदार अभय चव्हाण, पोलिस निरीक्षक अशोक धुमाळ, गटविकास अधिकारी संदीप जठार, तालुका आरोग्य अधिकारी डाॕ.अजित कारंजकर, काँग्रेसचे तालुका अध्यक्ष गंगाराम मातेरे, युवक अध्यक्ष सुहास भोते, दादाराम मांडेकर, युवा नेते मधुर दाभाडे, सरपंच समिर सातपुते, माजी सरपंच निलेश दगडे उपस्थित होते.

थोपटे म्हणाले की, पौड ग्रामीण रूग्णालयात आणि बावधन या दोन्ही ठिकाणी मेडिकल आँफिसर व नर्सची सोय केली जाईल. संदेश शिर्के म्हणाले की याठिकाणी आठवड्यातून सहा तास खाजगी डाँक्टर सेवा देतील. तहसिलदार चव्हाण म्हणाले की, पौड ग्रामीण रूग्णालयात होणाऱ्या प्रसुती या माण व माले याठिकाणी करण्यात येतील. तसेच येथे होणारे शवविच्छेदन व दररोजचे रूग्ण तपासणी पुढेही तशीच सुरू राहिल.