इंदापूर : इंदापूर पंचायत समितीत आयोजित पहिल्या तक्रार निवारण दिनात ८ माहिती अधिकार अपीलापैकी सात अपीलकर्त्यांची सर्व अपीले निकाली निघाली तर १० पैकी ९ उपस्थित तक्रारदारांचे म्हणणे ऐकून घेवून योग्य कार्यवाही करण्याचे आदेश देण्यात आले. प्रत्येक महिन्याच्या पहिल्या शुक्रवारी इंदापूर पंचायत समितीच्या लोकनेते शंकररावजी पाटील सभागृहात तक्रार निवारण दिनाचे आयोजन करण्यात येणार असल्याची माहितीगटविकास अधिकारी विजयकुमार परीट यांनी दिली.

इंदापूर पंचायत समितीत सर्वसामान्य नागरिकांच्या तक्रारीचे निवारण करण्यासाठी महाराष्ट्र शासन ग्रामविकास विभाग मुंबई यांच्या निर्देशानुसार शुक्रवार दि.१ ऑक्टोबर रोजी तक्रार दिनाचे आयोजन करण्यात आले होते. त्यास नागरिकांचा उस्फुर्त प्रतिसाद मिळाला.

विजयकुमार परीट पुढे म्हणाले, ज्या नागरिकांच्या काही समस्या असतील, त्यांनी आपल्या तक्रारी लेखी स्वरूपात पुराव्यासह इंदापूर पंचायत समिती कार्यालयाकडे द्याव्यात तसेच प्रत्येक महिन्याच्या पहिल्या शुक्रवारी तक्रार निवारण दिनी स्वतः उपस्थित राहून आपल्या प्रश्नाचे निराकरण करून घ्यावे. नागरिकांच्या तक्रारी,अडचणींची सोडवणूक करण्यासाठी पंचायत समिती कार्यालयात लेखी तक्रार दिलेल्या सर्व तक्रारदारांना सभे पूर्वी ८ दिवस अगोदर तक्रार निवारणदिनाची माहिती देण्यात येईल. तक्रारदारांनी आपल्या रास्त समस्यांचे निराकरण करण्यासाठी तक्रार निवारण दिनाचा फायदा घ्यावा असे आवाहन त्यांनी शेवटी केले.

यावेळी सहायक गटविकास अधिकारी रामचंद्र शिंदे, बांधकाम उपअभियंता एस.एस.कुपल ,सर्व संबंधित विस्तार अधिकारी, शाखा अभियंता, ग्रामसेवक, ग्रामविकास अधिकारी व कर्मचारी वर्ग उपस्थित होता.