पुणे - राज्यात वाचनाची चळवळ उभी रहायला हवी. प्रत्येकाने याच क्षणापासून वाचन सुरू केले पाहिजे, अशी अपेक्षा सातारा जिल्ह्यातील खटाव येथील ज्येष्ठ ग्रंथालयीन कार्यकर्ते जीवन इंगळे यांनी व्यक्त केली.

पुणे मराठी ग्रंथालयाच्या शतकोत्तर आठव्या वर्धापन दिन कार्यक्रमाचे शनिवारी (ता. १२) आयोजन करण्यात आले होते. या कार्यक्रमात ज्येष्ठ साहित्यिक डॉ. प्रकाश खांडगे, ज्येष्ठ साहित्यिका वीणा विजय देव, ज्येष्ठ कवी आणि गझलकार रमण रणदिवे यांना साहित्य क्षेत्रातील योगदानाबद्दल; तर इंगळे यांना ग्रंथालयीन चळवळीतील योगदानाबद्दल ‘साहित्यसम्राट न. चिं. केळकर ग्रंथालय’ पुरस्काराने गौरविण्यात आले, त्या वेळी इंगळे बोलत होते.

प्रत्येकी रोख पाच हजार रुपये, सन्मानचिन्ह आणि प्रमाणपत्र, असे या पुरस्काराचे स्वरूप आहे. यंदा या पुरस्काराचे ४२वे वर्ष आहे. या वेळी डॉ. सुरेश पळसोदकर, डॉ. अनुजा कुलकर्णी, प्रा. चारुदत्त निमकर आदी उपस्थित होते.
इंगळे म्हणाले, ‘‘कितीही तंत्रज्ञान वाढले असले, तरीसुद्धा किमान ग्रामीण महाराष्ट्रात तरी आजही वाचनसंस्कृती जिवंत आहे. ती यापुढेही टिकवून ठेवण्यासाठी प्रत्येकाने आजपासूनच वाचन सुरू करण्याची गरज आहे.’’ डॉ. देव, खांडगे, रणदिवे यांनीही मनोगत व्यक्त केले. डॉ. पळसोदकर यांनी प्रास्ताविक केले. मनीषा आणि सई सुमंत यांनी स्वागतगीत आणि पसायदान सादर केले. निमकर यांनी सूत्रसंचालन केले.