पुणे - कोरोनामुळे गेले दहा महिने एकही लोकअदालत झाली नाही. त्यामुळे तडजोडीसाठी इच्छुक असलेल्या अनेक पक्षकारांचे दावे प्रलंबित आहेत. हे दावे आता पहिल्यांदाच व्हिडिओ कॉलिंगद्वारे निकाली काढण्यात येणार आहे. 
१२ डिसेंबर रोजी होणाऱ्या महालोकअदालतीमध्ये दावा निकाली काढण्यासाठी कोणत्याही प्रकारच्या व्हिडिओ कॉलिंगचा वापर करण्यास महाराष्ट्र राज्य विधी प्राधिकरणातर्फे परवानगी देण्यात आली आहे. त्यामुळे घरबसल्या न्याय मिळणार आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

अशी असेल प्रक्रिया 
लोकअदालतीमध्ये खटला ठेवलेल्या वादी किंवा प्रतिवादीने त्याला प्रत्यक्ष हजर राहता येणार नसल्याची माहिती त्याच्या वकिलाला द्यावी. प्रकरण जेव्हा तडजोडीसाठी पॅनेलसमोर जाईल तेव्हा पक्षकाराला त्याच्या वकिलाच्या मोबाईलवर व्हिडिओ कॉलिंगद्वारे हजर व्हावे लागेल. 

अशी होणार सुनावणी  
ऑनलाइन हजर झालेल्या पक्षकारांची तपासणी झाल्यानंतर पॅनेल त्याला तडजोडीच्या अटी समजावून सांगेल. त्याला जर तडजोड मान्य झाली, तर निकाल दिला जाईल. 

मार्चपासून केवळ तत्काळ प्रकरणांवर सुनावणी होत आहे. अशा परिस्थितीत लोकअदालतीमध्ये लवकर दावे निकाली लागतात. तसेच कोर्ट फी परत मिळते. विशेष म्हणजे पहिल्यांदाच लोकअदालतीमध्ये व्हिडिओ कॉलिंगचा वापर करता येणार आहे. 
- चेतन भागवत, सचिव, पुणे जिल्हा विधी सेवा प्राधिकरण 

Edited By - Prashant Patil