पुणे - हलक्या प्रवासी आणि मालवाहू वाहनांसाठी यापुढे ‘ट्रान्स्पोर्ट’ प्रकारातील परवाना काढणे गरजेचे नाही. सामान्य परवाना काढून केवळ ‘बॅच’ असल्यास संबंधितांना प्रवासी आणि मालवाहतूक करता येणार आहे. त्यामुळे लाखो वाहतूकदारांना दिलासा मिळणार आहे. परिवहन आयुक्तांनी नुकतेच याबाबत परिपत्रक प्रसिद्ध केले आहे. 

परिवहन आयुक्त डॉ. अविनाश ढाकणे यांनी यासंबंधीचा आदेश सर्व प्रादेशिक परिवहन कार्यालयांना पाठवला आहे. परिपत्रकातील नियमानुसार ‘परिवहन’ आणि ‘सारथी’ प्रणालीत आवश्यक बदल करून घेण्याची सूचना परिवहन आयुक्तालयातील उपायुक्तांना (संगणक) केली आहे. त्यासाठी राष्ट्रीय सूचना केंद्राशी (एनआयसी) संपर्क साधण्यात येणार आहे.

दरम्यान, ई-कार्ट आणि ई-रिक्षा ही वाहने ट्रान्स्पोर्ट संवर्गात नोंदणी केली जात नाहीत. त्यामुळे ही वाहने चालविणाऱ्या चालकांकडे ‘ई-कार्ट’चे लायसन्स पुरेसे आहे. ई-रिक्षा चालविणाऱ्यांना ‘ई-कार्ट’ लायसन्ससह ‘बॅच’ काढावा लागणार आहे. तर मध्यम आणि जड माल वाहतुकीच्या आणि प्रवासी वाहनांच्या चालकांना ‘ट्रान्स्पोर्ट’ संवर्गातील परवाना पूर्वीप्रमाणेच आवश्यक असणार आहे.

देशातील सर्वांत युवा महिला पायलट; काश्मीरच्या आयशा अजीजचं नेत्रदिपक यश

आधीचा नियम काय सांगतो ?  
केंद्रीय मोटार वाहन कायद्यातील तरतुदीनुसार वाहनांच्या प्रकारानुसार चालकाकडे आनुषंगिक परवाना असणे बंधनकारक आहे. सद्यःस्थितीत आरटीओकडून हलक्या मोटारींसाठी ‘नॉन ट्रान्स्पोर्ट आणि ट्रान्स्पोर्ट’ अशा दोन संवर्गात लायसन्स दिली जातात. ‘नॉन ट्रान्स्पोर्ट’ संवर्गातील परवानाधारक केवळ खासगी मोटार वाहने चालवू शकतात. तर, ट्रान्स्पोर्ट परवानाधारक मालवाहू आणि प्रवासी वाहने चालवू शकतात. मात्र, नवीन नियमानुसार हलक्या मोटारींसाठी आता केवळ ‘नॉन ट्रान्स्पोर्ट’ लायसन्स दिले जाणार असून, त्या आधारेच प्रवासी आणि माल वाहतूक करता येणार आहे.

शेतकरी आंदोलनाच्या झळा आंतरराष्ट्रीय पातळीवर; रिहानाच्या ट्विटनंतर मोदी सरकारचं भलं मोठं उत्तर​

नवीन नियमानुसार बदल काय ?
हलक्या मोटारीच्या ‘नॉन ट्रान्स्पोर्ट’ परवान्यावर हलक्या वाहनातून मालवाहतूक करता येणार
हलक्या मोटारीच्या ‘नॉन ट्रान्स्पोर्ट’ परवान्यावर प्रवासी वाहतूक करता येणार; मात्र त्यासाठी ‘बॅज’ काढावा लागणार

ताज्या बातम्यांसाठी डाऊनलोड करा ई-सकाळचे ऍप