पौडरस्ता (पुणे) : नेहमीच्या सवयीप्रमाणे टपरीवरुन पान खायला घेतले...स्टाईलमध्ये थुंकत रस्त्यावर आपली सार्वजनिक मालकी असल्याची निशाणी सोडली...या सर्व हालचालींवर बारीक नजर ठेवून असलेल्या कोथरुड क्षेत्रिय कार्यालयाच्या कर्मचाऱ्यांनी त्याचे अभिनंदन करत, साहेब, तुम्ही घाण केलेला रस्ता पाणी टाकून, खराट्याने स्वच्छ करा...अशी नम्र विनंती केली. सर्वांदेखत आपला पोपट बनला आहे हे लक्षात येताच त्याने चूक कबूल करत रस्ता साफ करुन दिला. तसेच महापालिकेने आकारलेली दंडाची रक्कम भरत पुन्हा असे करणार नाही, अशी प्रतिज्ञा करत 'स्वच्छ भारत अभियान'ला पाठिंबा दिला.
'स्वच्छ भारत अभियान' व 'स्वच्छ सर्वेक्षण मिशन 2020' अंतर्गत आरोग्य विभागाच्या वतीने प्रत्येक आरोग्य कोठी अंतर्गत एक आरोग्य निरीक्षक व मुकादम, दोन सेवक अशा चार कर्मचाऱ्यांचे एक पथक नेमले आहे. कोथरुडमध्ये अशी पथके अस्वच्छता करणाऱ्या नागरिकांवर करडी नजर ठेवून दंडात्मक कारवाई करत आहेत.
कोथरूड उपनगरात सार्वजनिक ठिकाणी कचरा टाकणे, कचरा वर्गीकरण न करणे, राडारोडा टाकणे, कचरा जाळणे, उघड्यावर लघूशंकेस बसवून अस्वच्छता करणाऱ्या 128 नागरिकांवर कारवाई करून 44,300 रुपये प्रशासकीय शुल्क वसूल करण्यात आले. तसेच शिक्षक नगर, किनारा चौक, वनाझ काॅन॔र, भेलके नगर चौक, नवभूमी चौक, शिवाजी पुतळा चौक, डहाणूकर सर्कल, शिराळकर चौक, कर्वे पुतळा चौक इत्यादी सार्वजनिक ठिकाणी थुंकून अस्वच्छता करणाऱ्या एकूण 28 थुंकी सम्राटावर 4200 असे एकूण 48,500 रूपये दंडात्मक कारवाई करण्यात आली. तसेच काही थुंकी सम्राटा करवी रस्ता धुवून घेण्यात आला.
या मोहिमेत वरिष्ठ आरोग्य निरिक्षक राम सोनवणे, आरोग्य निरीक्षक सचिन लोहकरे, महेश लकारे, संतोष ताटकर, गणेश साठे, वैभव घटकांबळे, नवनाथ मोकाशी, सतीश बनसोडे, प्रमोद चव्हाण, मोकादम वैजीनाथ गायकवाड, अण्णा ढावरे, अशोक खुडे, अशोक कांबळे, साईनाथ तेलंगी यांनी सहभाग घेतला.
वैजीनाथ गायकवाड म्हणाले, की पुणे महानगरपालिकेला स्वच्छ सर्वेक्षण स्पर्धेत देशात एक नंबर मानांकन मिळविण्यासाठी व स्वच्छ सर्वेक्षणात नागरिकांचा 100 टक्के सहभाग वाढविण्यासाठी आम्ही कंबर कसली आहे. नागरिकांचाही त्याला चांगला प्रतिसाद मिळत आहे.
नागरिकांमध्ये स्वच्छतेविषयी जनजागृती व्हावी, मुंबई प्रांतिक अधिनियम १९४९ अन्वये स्वच्छतेविषयीच्या कलम व नियमांचे उल्लंघन होऊ नये म्हणून पथकाद्वारे जनजागृती मोहीम राबविण्यात येत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.