पुणे ः पुणे शहरातील आठ विधानसभा मतदारसंघांपैकी तीन जागांची मागणी एमआयएमने वंचित बहुजन आघाडीकडे केली आहे. हडपसर, वडगावशेरी आणि पुणे कॅन्टोन्मेंट या तीन विधानसभा मतदारसंघातून एमआयएमने निवडणूक लढविण्याची तयारी सुरू केली आहे.

विधानसभेसाठी महाराष्ट्रात एमआयएमला हव्यात एवढ्या जागा

पुणे कॅन्टोन्मेंट मतदारसंघ हा अनुसूचित जाती साठी आरक्षित असून, तेथून भाजपचे माजी समाजकल्याण राज्यमंत्री दिलीप कांबळे प्रतिनिधीत्व करीत आहेत. या मतदारसंघांत मुस्लीम समाजांचे मतदारही मोठ्या संख्येने आहेत. त्याचबरोबर हडपसर मतदारसंघातील कोंढवा परिसरातही मुस्लीम समाजाची संख्या लक्षणीय आहे. या दोन्ही मतदारसंघांत लढत दिल्यास, आगामी महापालिकेच्या निवडणुकीतही त्याचा फायदा होणार आहे.

राष्ट्रवादीसोबत 70 टक्के जागांवर सहमत

वंचित बहुजन आघाडीचीही पुणे कॅन्टोन्मेंट मतदारसंघातून निवडणूक लढविण्याची तयारी आहे. त्यामुळे आघाडीकडून काय प्रतिसाद मिळतो, त्याकडे एमआयएमचे लक्ष लागले आहे. भाजप-शिवसेना युती झाल्यास, त्यांच्याकडेही रिपब्लिकन पक्षाचे (आठवले गट) अध्यक्ष रामदास आठवले यांनी पुणे कॅन्टोन्मेंट मतदारसंघाची मागणी केली आहे. त्यामुळे या मतदारसंघातील लढत चुरशीची होण्याची शक्‍यता आहे.

एमआयएमने औरंगाबाद, मुंबई याबरोबरच पुण्यात पक्ष बांधणीकडे लक्ष दिले असून, त्यामुळेच तीन जागा लढविण्याची तयारी त्यांनी केली आहे. वंचित बहुजन आघाडीचे नेते प्रकाश आंबेडकर यांच्याकडून त्याबाबत प्रतिसाद मिळाल्यानंतर दोन्ही पक्षांमध्ये जागा वाटप निश्‍चित होईल, असे एमआयएमचे प्रदेशाध्यक्ष खासदार इम्तियाज जलील यांनी "ई सकाळ'शी बोलताना स्पष्ट केले.