मंचर : “खरीप हंगाम तोंडावर आला असून शेतकऱ्यांनी शेतमशागतीची कामे सुरू केली आहेत. पण अशातच खताची दरवाढ ६० टक्के झाली आहे. खताचे बाजारभाव खत कंपन्यांनी भरमसाठ वाढविल्यामुळे शेतकरी वर्ग अस्वस्थ झाला आहे. वाढलेले खतांचे दर कमी व्हावेत. म्हणून केंद्र सरकारला पत्र देऊन पंतप्रधान नरेंद्र मोदी यांच्याकडे पाठपुरावा करून बळीराजाला न्याय मिळवून देण्याचे काम करू.” अशी ग्वाही शिरूर लोकसभा मतदार संघाचे खासदार डॉ. अमोल कोल्हे यांनी दिली.

अवसरी खुर्द (ता. आंबेगाव) येथील शासकीय कोविड उपचार केंद्राला डॉ. कोल्हे यांनी शनिवारी (ता. १५) रात्री भेट दिली. त्यांच्या समवेत पुणे जिल्हा परिषदेचे माजी उपाध्यक्ष विवेक वळसे पाटील, पंचायत समितीचे उपसभापती संतोष भोर, तहसीलदार रमा जोशी, गटविकास अधिकारी जालिंदर पठारे, सुहास बाणखेले, राजेंद्र थोरात, सरपंच जगदीश अभंग, दिनेश खेडकर, सुरेश निघोट उपस्थित होते.

सुरुवातीला डॉ. कोल्हे यांनी हॉस्पिटलमध्ये जाऊन थेट उपचार घेत असलेल्या कोरोना बाधित रुग्णांशी सवांद साधला. “येथे चांगले उपचार, सकस नाश्ता व जेवण मिळते, तुम्ही लवकर बरे होणार आहात.” असे सांगून त्यांना प्रेरणा व प्रोत्साहन देण्याचे काम केले. डॉक्टर व परिचारिकांच्या कामाचे त्यांनी कौतुक केले.

त्यानंतर शेतकऱ्यांच्या शिष्टमंडळाने डॉ. कोल्हे यांची भेट घेतली. “खत उत्पादक कंपन्यांनी खताच्या दरात फार मोठ्या प्रमाणात वाढ केली आहे. शेतकऱ्यांचे आर्थिक गणित बिघडवणारी दरवाढ आहे. उत्पादन खर्चानुसार शेतमालाला हमीभाव मिळत नसल्याने शेतकरी संकटात सापडला आहे. खताच्या किमती कमी करण्यासाठी आपण पुढाकार घ्यावा.”अशी विनंती शेतकऱ्यांनी केली.

गेली सव्वा वर्ष शेतकरी कोरोना व लॉकडाउनमुळे त्रस्त झालेला आहे. शिरूर, खेड, आंबेगाव, जुन्नर व राज्याच्या अन्य भागातील शेतकर्यांनी खत दरवाढीबद्दल चिंता व्यक्त केली आहे. शेतकऱ्यांचा उत्पादन खर्चही भागत नाही. ही वस्तुस्थिती केंद्र सरकारच्या निदर्शनास आणून दिली जाईल. खत दरवाढ रोखण्यासाठी पाठपुरावा करणार आहे.

-डॉ. अमोल कोल्हे, खासदार