दौंड (पुणे) : दौंड शहरातील कोरोनाबाधित रूग्णांच्या संपर्कातील नागरिकांचे विलगीकरण करण्यासाठी नियुक्त पथकातील आणखी एका नगरपालिका आरोग्य कर्मचारीस कोरोना विषाणूची बाधा झाली आहे. तालुक्यातील ५० कोरोना संशयित नागरिकांचे घशातील स्त्राव तपासणीसाठी (स्वॅब टेस्ट) पुणे येथे पाठविण्यात आले व त्यापैकी तब्बल ४१ जणांचा वैद्यकीय अहवाल नकारात्मक आल्याने दिलासा मिळाला आहे. 

खडकवासला प्रकल्पात निम्म्याहून कमी साठा
                   
दौंड शहरात कोरोनाचा प्रादुर्भाव रोखण्यात अग्रभागी असलेल्यांना उप जिल्हा रूग्णालयातील एका महिला कर्मचारी, नगरपालिकेच्या विलगीकरण पथकातील आरोग्य कर्मचारी आणि एका ४० वर्षीय खासगी रूग्णवाहिका चालकास २० ते २४ जुलै या काळात बाधा झालेली आहे. तर, ३० जुलै रोजी पर्सनल प्रोटेक्शन इक्विपमेंट (पीपीइ) घालून बाधित नागरिकांचे विलगीकरण करणाऱ्या ३१ वर्षीय कर्मचाऱ्यास बाधा झाली आहे. सदर बाधित नगरपालिका कर्मचारी नगरपालिकेचे आरोग्य निरीक्षक शाहू पाटील यांच्या आरोग्य पथकात लॅाकडाउन जाहीर झाल्यापासून सक्रियपणे नागरिकांमध्ये जनजागृती करणे आणि बाधितांचे विलगीकरण करण्याच्या कार्यात अग्रभागी आहे. 

बारामतीत कोरोनाचा बारावा बळी
                 
दौंड उप जिल्हा रूग्णालयाकडून ३० जणांचे घशातील स्त्राव तपासणीसाठी पाठविण्यात आले होते. त्यापैकी ३० जुलै रोजी आलेल्या अहवालानुसार २१ जणांचा तपासणी अहवाल नकारात्मक आल्याने शहर आणि परिसरातील नागरिकांना दिलासा मिळाला आहे. शहरातील पाटील चौक, शालीमार चौक, जनता काॅलनी, बंगला साइड, पं. नेहरू चौक, गजानन सोसायटी, भवानीनगर व लिंगाळी (ता. दौंड) हद्दीत जगदाळे वस्ती येथे एकूण नऊ जणांना बाधा झाली आहे. बाधितांमध्ये ६ पुरूष व ३ महिलांचा समावेश असून, त्यांचे वय १८ ते ७५ दरम्यान आहे, अशी माहिती रूग्णालय अधीक्षक डॅा. संग्राम डांगे यांनी दिली.

पुण्याच्या आणखी बातम्या वाचण्यासाठी येथे क्लिक करा
               
दौंड तालुक्याच्या ग्रामीण भागातील २० नागरिकांचे स्त्राव तपासणीसाठी पाठविण्यात आले होते. त्यापैकी ३० जुलै रोजी आलेल्या अहवालानुसार सर्व २० जणांचा वैद्यकीय तपासणी अहवाल नकारात्मक आला आहे, अशी माहिती दौंड तालुका आरोग्य अधिकारी डॅा. अशोक रासगे यांनी दिली.