मंचर : आंबेगाव तालुक्यात आज (ता. ५) पारगाव-शिंगवे व एकलहरे येथील एकूण दोन रुग्ण कोरोना पॉझिटिव्ह आढळून आले आहेत. एकूण पॉझिटिव्ह आलेल्या रुग्णांची संख्या ६२ झाली आहे. त्यापैकी बरे झालेल्या ४८ जणांना घरी सोडले आहे. दोन जणांचा मृत्यू झाला असून ४ जण पुणे येथे व ८ जणांवर भीमाशंकर हॉस्पिटलमध्ये उपचार सुरु आहेत. ४२ जणांचे अहवाल प्रतीक्षेत आहेत. पॉझिटिव्ह रुग्णांची संख्या वाढत चालल्याने प्रशासनाची डोकेदुखी वाढू लागली आहे. त्यामुळे नागरिकात चिंता वाढली आहे. प्रशासनाने तालुक्यातील सर्व कुटुंबांचे सर्वेक्षण करावे अशी मागणी आंबेगाव तालुका पंचायत समिती सदस्य राजाराम बाणखेले यांनी केली आहे.

लॉकडाऊनमधील लग्नाचा नवीन ट्रेंड; नवरा-नवरीला मिळतोय मॅचिंग मास्क

एकलहरेच्या अल्पवयीन पिडीत मुलीचे जबाब मंचर पोलिस ठाण्यात व त्यानंतर घोडेगाव न्यायालयात घेण्यात आले. उपजिल्हा रुग्णालयात वैद्यकीय तपासणी करताना तिच्यात लक्षणे दिसून आली. त्यामुळे तिला ससूनला पाठविण्यात आले. ती पॉझिटिव्ह आल्याची माहिती वाऱ्यासारखी पसरली. तिच्या संपर्कात आलेले मंचर पोलिस ठाण्यातील ६ पोलिस कर्मचारी, मंचर उपजिल्हा रुग्णालयातील दोन डॉक्टर व घोडेगाव न्यायालयातील वकील, लिपिक, शिपाई यांच्यासह चार कर्मचारी अशा एकूण १२ जणांना होम क्वरंटाईन केले आहे. या सर्वांचे नमुने तपासणीसाठी पुण्याला पाठविले जाणार आहे. या घटनेमुळे पोलिस अधिकारी, कर्मचारी, न्यायालयात वावर असलेले वकील व कर्मचाऱ्यांची धाकधूक वाढली आहे.

पुणेकरांनो, घराबाहेर पडताय? रेनकोट, छत्री सोबत असु द्या, कारण...

या संदर्भात तालुका आरोग्य अधिकारी डॉ. सुरेश ढेकळे म्हणाले, ''सदर मुलगी पूर्वी लोंढेमळा-एकलहरे येथे राहत होती. पण एक महिन्यापासून तिचे वास्तव्य शिरूरला आहे. शिरूर येथेही तिच्यावर प्राथमिक उपचार करण्यात आले आहेत. याबाबत शिरूरच्या तालुका अधिकारी यांच्यासोबत चर्चा झाली आहे.'' आंबेगाव तालुक्यात कोरो ना पॉझिटिवसंख्या दिवसेंदिवस वाढत चालली आहे.