औंध (पुणे) : सध्या कोरोनाच्या भीतीने रुग्णांना किंवा जखमींना मदत करण्यासाठीसुद्धा कोणी समोर येत नसल्याचे चित्र सर्वत्र पाहायला मिळत आहे. परंतु, प्रशासकीय यंत्रणा मात्र आपले कर्तव्य बजावतांना दिसत आहेत. औंध मधील जयराम रमेश गायकवाड (वय ४२) या व्यक्तीने स्वत:वर धारदार कात्रीने वार करुन घेतले व यात तो गंभीर जखमी झाला. संबंधित व्यक्ती सिद्धार्थ नगर लेन नंं. १ शौचालयाच्या पहिल्या मजल्यावर गंभीर अवस्थेत पडल्याची माहिती मिळाली.

...म्हणून भक्कम दिसणारी झाडे पावसाळ्यात पडतात उन्मळून

माहिती मिळताच चतु:श्रृंगी पोलीस ठाण्याचे मार्शल दत्ता गेंगजे व प्रविण शिंदे यांनी घटनास्थळी जाऊन त्याला दवाखान्यात नेण्यासाठी रुग्णवाहिकेसाठी संपर्क साधला परंतु एकही रुग्णवाहिका चालक यायला तयार नव्हता. वेगवेगळी कारणे देत येण्यास टाळाटाळ केली गेली. यानंतर पोलीस ठाण्यात संपर्क करुन तेथील टु-मोबाईल व्हॅन मागवली. यामधील कर्मचारी वंदू गिरे व किशोर शिखरे यांनी स्थानिक नागरिकांना मदतीसाठी बोलावले असता कोरोनाच्या भीतीने कोणीही  मदतीला आले नाही.

पुण्यातील काही उद्याने उघडली; पण...

त्याच्या पोटातून रक्त वाहत असल्याने पोलिसांनी त्याला पहिल्या मजल्यावरुन स्ट्रेचरवर खाली आणले. आणि तातडीने औंध जिल्हा रुग्णालयात दाखल केले. पोलिसांनी दाखवलेल्या तत्परतेने संबंधिताचे प्राण वाचले परंतु नागरिकांनी मदत न करता केवळ बघ्याची भूमिका घेतल्याने कोरोनाचा प्रभाव अजूनही लोकांमध्ये असल्याचे दिसून आले आहे. पोलीस कर्मचारी दत्ता गेंगजे, प्रविण शिंदे, वंदू गिरे व किशोर शिखरे यांनी याप्रसंगी उत्तम कामगिरी बजावली.

पुण्याच्या बातम्या वाचण्यासाठी येथे ► क्लिक करा