निरगुडसर (पुणे) : आंबेगाव तालुक्यातील रांजणी ग्रामस्थांनी गेल्या तीन महिन्यांपासून कोरोनामुक्त गाव ठेवण्यात महत्वाची भूमिका बजावली, परंतु गावी सुरू असलेल्या बंगल्याच्या कामासाठी मुंबईहून ये- जा करणाऱ्या गृहस्थाचा रिपोर्ट अखेर पाॅझिटिव्ह आला. त्यामुळे ग्रामस्थांची धाकधूक वाढवली आहे.  

रांजणी- जाधववाडी सीमेवर एका बंगल्याचे काम सुरू आहे. या कामासाठी मुंबईहून एक जण गावी ये- जा करत होता.  ग्रामस्थांनी काळजी घेण्याचे सांगून देखील त्याची ये- जा सुरू होती. नऊ जुलैपासून तो गावीच होता. त्याने ताप येऊ लागल्याने पहिल्यांदा नारायणगाव व नंतर गावातील खासगी रुग्णालयात उपचार घेतले. परंतु, ताप अधिक असल्याने त्यांना सरकारी रुग्णालयात जाण्याचा सल्ला दिला. त्यावेळी त्यांची कोरोना टेस्ट आज पाॅझिटीव्ह आली. त्यामुळे गेल्या तीन महिन्यापासून कोरोनामुक्त असलेल्या रांजणी गावात कोरोनाचा शिरकाव झाला. त्यातून ग्रामस्थांमध्ये चिंतेचे वातावरण आहे.

जेव्हा शरद पवार रमतात जुन्या आठवणीत

थोरांदळे येथे आठ दिवसांपूर्वी रुग्ण सापडल्याने दक्षता म्हणून गाव बंद करण्यात आले होते. परंतु, रांजणी- जाधववाडी सीमेवर असलेल्या घराचे काम सुरू असल्याने संबंधित व्यक्ती मुंबईहून ये- जा करत होती. ते आज पाॅझिटीव्ह सापडले. त्यामुळे मंचरचे पोलिस निरीक्षक कृष्णदेव खराडे, पंचायत समितीचे गटविकास अधिकारी जालिंदर पठारे यांनी गाव 14 दिवसांसाठी सील केले आहे. तसेच, घरातील सहा व्यक्ती होम क्वारंटाइन केल्या आहेत. या वेळी सरपंच भगवान भोर, उपसरपंच किरण भोर, तलाठी विशाल मुंगळे, जाधववाडी पोलिस पाटील जाधव आदी उपस्थित होते

रांजणी ग्रामपंचायतीचे कर्मचारी, अंगणवाडी सेविका, आशा वर्कर, शिक्षक व अन्य कर्मचाऱ्यांमार्फत सर्व्हेक्षण करण्यात आले होते. तसेच, उपाययोजनांबाबत ग्रामस्थांमध्ये जनजागृती करण्यात आली होती. तालुक्यातील अजून 131 रिपोर्ट येणे बाकी असल्याची माहिती जालिंदर पठारे यांनी दिली.

पुण्याच्या इतर बातम्या वाचण्यासाठी येथे क्लिक करा

‘‘सर्दी, खोकला, घसादुखी, ताप व अंगदुखी असणाऱ्या नागरिकांनी गावातील प्राथमिक आरोग्य केंद्र व ग्रामपंचायतीशी संपर्क साधावा. नागरिकांनी घाबरुन जाऊ नये. वेळोवेळी हात धुवून मास्क व सॅनिटायझरचा वापर करावा. विनाकारण बाहेर फिरू नये,’’ असे आवाहन डॉ. सुरेश ढेकळे यांनी केले.
 
Edited By : Nilesh J. Shende