पुणे ः प्रवाशांनी तीन एप्रिलपूर्वी काढलेल्या पासची मुदत वाढवून देण्यात येणार असल्याचे पीएमपी प्रशासनाने शुक्रवारी जाहीर केले. मात्र, प्रवाशांना पास केंद्रांवरून त्यांची मुदत वाढवून घ्यावी लागणार आहे.

पुणे व पिंपरी-चिंचवड शहरात कोरोनाच्या पार्श्वभूमीवर लॉकडाऊन जाहीर होणेपुर्वी अनेक नोकरदार, विद्यार्थी व ज्येष्ठ नागरिकांसह नियमित प्रवाशांनी पास केंद्रावरून पीएमपीचे बस पासेस काढलेले आहेत. परंतु, ३ एप्रिल रोजी अचानक लॉकडाऊन जाहीर झाल्याने अशा पासधारकांना बस पासचा वापर करता आलेला नाही.

पीएमपीची वाहतूक ६ जूनपासून सुरू झाली आहे. त्यामुळे स्वारगेट, हडपसर बसस्थानक, मनपा, डेक्कन, पुणेस्टेशन (मोलेदीना), वाघोली, कात्रज, वारजे माळवाडी, निगडी, चिंचवड गाव, पिंपरी चैक (लोखंडे सभागृह), पिंपळे गुरव, भोसरी (शिवाजी चौक) आळंदी, सासवड, उरूळीकांचन व राजगुरूनगर या पास केंद्रांवर संबंधित पास धारकांचे अर्ज स्वीकारून त्यांना मॅन्युअल पास व मी-कार्ड पासची मुदत वाढवून देण्यात येणार आहे. तरी संबंधित पासधारकांनी अर्ज व मुळ पाससह वर नमुद केलेल्या पास केंद्रांवर २० जूनपर्यंत पासवर मुदत वाढवून घ्यावी. त्यानंतर कोणतीही तक्रार विचारात घेतली जाणार नाही, असे पीएमपी प्रशासनाने स्पष्ट केले आहे.