पुणे : पुण्यातील कॅन्टोन्मेंट बोर्डाच्या हद्दीत गेल्या दहा दिवसांपासून कोरोनाच्या रूग्णात वाढ होऊ लागली आहे. त्यामुळे बोर्ड प्रशासनन सजग झाले आहे. पटेल रूग्णालयाचे कर्मचारी तसेच वैद्यकीय अधिकारी यांची टीम कोरोनाच्या रूग्णांवर सध्या उपचार करीत आहेत. या रुग्णांमधील तीन रूग्णांची स्थिती गंभीर आहे. त्यामुळे त्यांच्यावर अतिदक्षता विभागात उपचार सुरू आहेत.  गेल्या दहा ते पंधरा दिवसात कॅन्टोन्मेंट बोर्डाच्या हद्दीत 225 रूग्ण आढळून आले आहेत. त्यापैकी 40 जणांवर पटेल रूग्णालयात उपचार सुरू आहेत. तर 150 रूग्णांना क्वारंटाईन करण्यात आले आहे.

हेही वाचा - लक्षणे नसलेल्या कोरोना रुग्णाला दहाव्या दिवशी डिस्चार्ज; टेस्टचीही गरज नाही

याबाबत माहिती देताना पटेल रूग्णालयाचे निवासी वैद्यकीय अधिकारी डॉ. विद्याधर गायकवाड म्हणाले,“ कॅन्टोन्मेंट भागात रूग्ण वाढत असले तरी त्यांच्यावर उपचार करण्याचे काम युध्दपातळीवर सुरू आहे. सध्या प्रत्येक वॉर्डामध्ये जाऊन नागरिकांच्या तपासण्या सुरू आहेत. कॅन्टोन्मेंट  बोर्डाच्या हद्दीत गेल्या जानेवारी महिन्यापासून कोरोना लस देण्यास सुरूवात झाली आहे. आतापर्यत सुमारे पाच हजार जणांचे लसीकरण  करण्यात आले आहे. हे लसीकरण नियमानुसार करण्यात येत आहे.

हेही वाचा - रात्रीच्या संचारबंदीने हिरावला तोंडचा घास, पुन्हा उपासमारीची वेळ

पुण्यातील रुग्णसंख्या गगनाला

पुण्यात कोरोनाची वाढती रुग्णसंख्या हा चिंतेचा विषय बनला आहे. देशात महाराष्ट्रात आणि महाराष्ट्रात पुण्यात सर्वाधिक रुग्णांची नोंद होत आहे. कोरोनाच्या पहिल्या लाटेत देखील पुण्याची स्थिती अत्यंत गंभीर बनली होती. आणि आता कोरोनाच्या दुसऱ्या लाटेत देखील पुण्याचाच क्रमांक वरती आहे. पुण्यातील ही परिस्थिती पाहता पुण्याचे पालकमंत्री अजित पवार यांनी लॉकडाऊनचे संकेत देत येत्या दोन एप्रिल रोजी याबाबतचा निर्णय घेऊ, असे जाहीर केले आहे.