पुणे - बंगळूर-पुणे आणि पुणे-बंगळूर विमानांच्या उड्डाणांना विलंब झाल्यामुळे सुमारे 350हून अधिक प्रवाशांना पुणे आणि बंगळूर विमानतळावर रात्र जागून काढावी लागली. तसेच नागपूरला जाणारे विमानाचे उड्डाण चार तास विलंबाने झाल्यामुळे त्यातील सुमारे 140 प्रवासी त्रस्त झाले. 

बंगळूर विमानतळावरून रविवारी रात्री साडेअकरा वाजता "गो एअर'च्या विमानाचे पुण्यासाठी उड्डाण होणार होते. सोमवारी पहाटे एकच्या सुमारास ते पुण्यात पोचणे अपेक्षित होते. त्यासाठी सुमारे 180 प्रवासी विमानतळावर थांबले होते; तर पुण्याहून तेच विमान सोमवारी पहाटे 1 वाजून 25 मिनिटांनी बंगळूरकडे जाणार होते. तेथे पहाटे तीन वाजता पोचणार होते. त्यासाठी सुमारे 170 प्रवासी लोहगाव विमानतळावर थांबले होते. बंगळूर आणि पुण्यात नोकरी करणाऱ्या अनेकांचा त्यात समावेश होता. रविवारची सुटी संपवून बहुतेक जणांना सोमवारी कामावर जायचे होते. बंगळूरहून पुण्याकडे येणारे विमान सुमारे दीड तास उशिरा निघेल, असे सुरवातीला सांगण्यात आले. नंतर पहाटे साडेचार वाजता ते रद्द झाल्याचे जाहीर करण्यात आले; तर पुण्याहून बंगळूरकडे जाणारे विमान पहाटे तीन वाजता निघेल, असे सुरवातीला सांगण्यात आले; परंतु पहाटे ते रद्द झाल्याचे सांगण्यात आले. सुमारे 40 प्रवाशांना मुंबईहून बंगळूरला पाठविण्यात आले. मात्र, उर्वरित प्रवाशांची मोठ्या प्रमाणात गैरसोय झाली. 

बंगळूर विमानतळावर तर प्रवाशांना चहाही विचारण्यात आला नाही, असे सचिन कुलकर्णी, विशाल अग्निहोत्री यांनी सांगितले. "गो एअर'च्या कर्मचाऱ्यांकडे विचारणा केली असता त्यांनी पुन्हा आमच्या एअरलाइनने प्रवास करू नका, असे त्यांना सांगण्यात आले. पुण्याहून सकाळी पावणेआठ वाजता नागपूरला निघणारे "गो एअर'चे विमानही सुमारे चार तासांनी उशिरा निघाले. या विमानाच्या बाबतीत कायमच असा प्रकार घडतो, असा अनुभव प्रवासी मुकुंद जोशी यांनी सांगितले. 

"गो एअर'ची माफी 
बंगळूर-पुणे आणि पुणे-बंगळूर विमानांचे उड्डाण तांत्रिक कारणामुळे रद्द झाले. पुण्याहून बंगळूरला जाणाऱ्या प्रवाशांची काळजी घेण्यात आली होती; तर नागपूरला जाणाऱ्या विमानाचे उड्डाण तांत्रिक कारणामुळे उशिरा झाले. याबाबत प्रवाशांना वेळीच माहिती देण्यात आली होती. तसेच त्यांना झालेल्या त्रासाबद्दल कंपनी माफी मागत असल्याचे "गो एअर'च्या सूत्रांनी सांगितले.