पुणे : राज्यात व शहरात वाढत असलेली कोरोना बाधितांची संख्या यापार्श्वभूमीवर २ ते ६ फेब्रुवारी दरम्यान होणारा ६८वा सवाई गंधर्व भीमसेन महोत्सव रद्द करण्यात आला आहे, अशी माहिती आर्य संगीत प्रसारक मंडळाचे कार्याध्यक्ष श्रीनिवास जोशी (Shrivivas Joshi) यांनी दिली आहे. (Pune this year Sawai Gandharva Bhimsen Festival canceled)

यावर स्पष्टीकरण देताना जोशी म्हणाले, राज्यात व शहरात वाढत असलेली कोरोना बाधितांची संख्या आणि राज्य सरकार व स्थानिक प्रशासन यांच्याकडून परिस्थितीनुसार वेळोवेळी बदलण्यात येत आहेत. यामुळं निर्माण झालेल्या अनिश्चिततेच्या पार्श्वभूमीवर येत्या २ ते ६ फेब्रुवारी दरम्यान आयोजित करण्यात येत असलेला ६८ वा सवाई गंधर्व भीमसेन महोत्सव रद्द करण्यात येत आहे.

यंदा भारतरत्न पंडित भीमसेन जोशी यांचे जन्म शताब्दी वर्ष असल्याने महोत्सव व्हावा अशी रसिकांची प्रबळ इच्छा होती परंतु महोत्सवाची भव्यता, व्याप्ती व आयोजनासाठी लागणारा वेळ बघता सद्य परिस्थितीत महोत्सव रद्द करण्याशिवाय दुसरा कोणताही पर्याय उरला नसल्यानं हा निर्णय घेण्यात आला आहे, असंही जोशी यांनी सांगितलं.