तळेगाव ढमढेरे (पुणे)  : रांजणगाव गणपती (ता. शिरूर) येथील अष्टविनायक महागणपतीचे मंदिर सोमवारपासून भाविकांना दर्शनासाठी खुले होणार असल्याची माहिती देवस्थान ट्रस्टच्या विश्वस्तानी आज दिली.

कोरोना विषाणूला प्रतिबंध करण्यासाठी मार्च महिन्यापासून दर्शनासाठी मंदिर बंद होते. राज्य सरकारच्या सूचनेनुसार सोमवार (ता.१६) पासून नागरिकांना महागणपतीचे दर्शन मिळणार आहे. मात्र त्यासाठी नागरिकांना नियमाचे पालन करावे लागणार आहे. 

हे ही वाचा : लेण्याद्री दर्शनाचा मार्ग सोमवारपासून खुला; भाविकांना नियम बंधनकारक

देवस्थान ट्रष्टचे विश्वस्त प्रा.नारायण पाचुंदकर, डॉ.संतोष दुंडे, ऍड विजयराज दरेकर व शेखर देव आणि व्यवस्थापक बाळासाहेब गोऱ्हे यांनी मंदिरात योग्य ती खबरदारी घेतली असून नागरिकांनी स्वतःची काळजी घेऊन मास्क, सॅनिटायझर व इतरत्र स्पर्श न करण्याचे आवाहन केले आहे. दरम्यान मंदिरात दर्शनासाठी येणाऱ्या भाविकांना सुरळीतपणे व सुरक्षित दर्शन मिळण्यासाठी आवश्यक ठिकाणी बँरिगेट लावण्यात आले आहेत. दोन व्यक्तींमध्ये  सामाजिक अंतर राहण्यासाठी दर्शन रांगेत चौकोनी खुणा करण्यात आल्या आहेत. दर्शनासाठी येणाऱ्या नागरिकांना मंदिराच्या मुख्य दरवाजाजवळच मास्कची तपासणी व सँनिटायझर करण्यात येणार आहे.

हे ही वाचा : दिव्यांगांच्या खात्यावर जमा करण्यात आले अर्थसाहाय्य

मंदिराच्या परिसरात प्रवेश करताना मास्क बंधनकारक असून आजारी व्यक्ती, ज्येष्ठ नागरिक, लहान मुले व गर्भवती महिला यांनी मंदिरात येणे टाळावे. मंदिरात सोशल डिस्टंसिंगचे पालन करणे बंधनकारक राहील. दर्शन गाभाऱ्यात  'श्री'चे दर्शन घेताना हात जोडून दर्शन घ्यावे इतरत्र कोठेही स्पर्श करू नये. मंदिरात दर्शनाला येताना प्रसाद, हार, नारळ व फुले घेऊन येणे टाळावे. मंदिरात प्रवेशद्वारावरच हात सॅनिटायझरने स्वच्छ करावे व थर्मल स्कॅनिंग करून नंतरच मंदिरात प्रवेश करावा, असे आवाहन विश्वस्तांनी केले आहे.

संपादन - सुस्मिता वडतिले