पुणे : क्लार्क आणि शिपाई पदाच्या भरती प्रक्रियेसाठी अप्पर कामगार आयुक्त कार्यालयाने काम सोपविलेल्या संस्थेनेच उत्तर पत्रिकेत खाडाखोड करुन उमेदवारांच्या निकालात फेरफार केल्याचा गंभीर प्रकार समोर आला आहे. याप्रकरणी परीक्षा घेण्याचे काम दिलेल्या कंपनीच्या संचालकांविरुद्ध अप्पर कामगार आयुक्तालयाच्या वतीने खडकी पोलिस ठाण्यात गुन्हा दाखल करण्यात आला आहे. दोघा उमेदवारांनी केलेल्या तक्रारीवरुन हा प्रकार उघडकीस आला आहे़ 

- पुणेकरांनो, कोरोनाचा आकडा वाढतोय; आणखी नव्या ५०० रुग्णांची पडली भर!

प्रसाद बांदिवडेकर (संचालक, मे एक्झॉन ऑटोमेशन, दादर, मुंबई, सध्या एस बी सिस्टिम प्रा.लि. (विश्व कुटीर शंकर घाणेकर मार्ग, दादर), आनंद काळे व इतर अशी गुन्हा दाखल झालेल्यांची नावे आहेत. हा प्रकार 22 जानेवारी ते 10 मार्च 2017 या कालावधीत घडला होता. या प्रकरणी सहायक कामगार आयुक्त मुजम्मील मुजावर (वय ३४, रा. जुनी सांगवी) यांनी खडकी पोलिसांकडे फिर्याद दिली आहे.

- 'मुख्यमंत्रीसाहेब, 'त्या' कुटुंबांना महिना दहा हजार मदत द्या'; कोणी केलीय ही मागणी?

पोलिसांनी दिलेल्या माहितीनुसार, अप्पर कामगार आयुक्त कार्यालयामार्फत 2015 साली सरळ सेवा भरती प्रक्रिया राबविण्यात आली होती. त्यात क्लार्क, शिपाई (वर्ग क व ड) आठ हजार 94 पदांची भरती होणार होती. एक्झॉन कंपनीला परीक्षा घेऊन लेखी पेपर तपासण्याचे काम संबंधित कंपनीला देण्यात आले होते. कंपनीने आर्थिक प्रलोभनाला बळी पडून नियमांना बगल देऊन त्यांनी भरती प्रक्रियेतील क्रमांक एक आणि दोन उमेदवारांच्या उत्तरपत्रिकेत खाडाखोड केली. तसेच त्यांच्या निकालांत फेरफार केला. त्यामुळे या दोन उमेदवारांना शासकीय सेवेपासून वंचित राहावे लागले.

- लॉकडाउनमध्येही 'आरटीओ' मालामाल; तिजोरीत जमा झाली एवढी गंगाजळी!

उमेदवारांचे आर्थिक नुकसान करुन उमेदवारांची व शासनाची फसवणुक केली. त्यामुळे महेंद्र देशमुख आणि सुधाकर इंगळे यांनी याचा सातत्याने पाठपुरावा केला. कामगार आयुक्तांनी या परिक्षेची चौकशी केली. त्यात त्यांच्या उत्तर पत्रिकेत खाडाखोड केल्यामुळे त्यांना शासकीय नोकरी मिळू शकली नसल्याचे स्पष्ट झाल्याने कंपनी व संचालकांविरुद्ध तब्बल तीन वर्षांनी गुन्हा दाखल करण्यात आला आहे. सहायक पोलिस निरीक्षक पी. एस. देवकर अधिक तपास करीत आहेत.

- ताज्या बातम्यांसाठी डाऊनलोड करा ई-सकाळचे ऍप 

- पुण्याच्या बातम्या वाचण्यासाठी येथे  क्लिक करा