पिरंगुट - मुठा (मुळशी) येथील खिंडीलगतच्या जंगलात पुणे येथील माहिती अधिकार कार्यकर्ते विनायक सिरसाट यांचा मृतदेह सापडला आहे. आठ दिवसांपासून ते बेपत्ता होते. पोलिस या प्रकरणाचा तपास सुरु केला आहे. विनायक शिरसाट यांनी अवैध बांधकामांविरोधात आवाज उठवला होता.

पौड पोलिसांनी दिलेल्या माहितीनुसार, विनायक सिरसाट हे ३० जानेवारी रोजी कात्रज येथून अचानक बेपत्ता झाले होते. याबाबत त्यांच्या नातेवाईकांनी भारती विद्यापीठ पोलिस चौकीत तक्रार दिली होती. सिरसाट यांचा अनेक ठिकाणी शोध घेऊनही ते न सापडल्याने ५ जानेवारी रोजी ते बेपत्ता असल्याची नोंद करून पोलिसांनी त्यांचा तपास सुरू केला होता. 

दरम्यान, सिरसाट यांच्या मोबाईल लोकेशनचा तपास करत असताना त्यांच्या फोनचे लोकेशन पुणे-लवासा रस्त्यावरील मुठा गावच्या हद्दीत दिसून येत होते. त्यनुसार तपास केला असता पोलिसांना त्यांचा मृतदेह मुठा (ता. मुळशी) येथील खिंडीलगतच्या जंगलात अढळला. त्यांचा मृतदेह कुजलेल्या अवस्थेत होता. शिरसाट यांचा मृतदेह शवविच्छेदनासाठी ससून रुग्णालयात पाठवण्यात आला आहे. 

त्यांच्या अंगावरील कपडे व मोबाईल लोकेशन यामुळे सिरसाट यांच्या नातेवाईकांनी मृतदेहाची ओळख पटविली. पौडचे पोलिस निरीक्षक सुरेश निबांळकर व त्यांच्या सहकाऱ्यांनी मृतदेह शोधण्यात भारती विद्यापीठ पोलिसांना मोलाची मदत केली. पुढील तपास भारती विद्यापीठ चौकीचे पोलिस करीत आहेत.