भाजपचे दिवंगत नेते गिरीश बापट यांच्या निधनानंतर रिक्त झालेल्या पुणे लोकसभेच्या जागेवरून राज्यातील राजकारण पेटलं आहे. पुणे लोकसभेची जागा कोणाला मिळावी यासाठी दावे प्रतिदावे केले जात आहेत. लोकसभेची लवकरच पोटनिवडणूक लागण्याची शक्यता आहे.

दरम्यान पुण्याची जागा कोणाला मिळावी यावरू महाविकास आघाडीमधील काँग्रेस-राष्ट्रवादी आणि उद्धव ठाकरे यांनी शिवसेना या तिन्ही पक्षांमध्ये रस्सीखेच सुरू असल्याचं पाहायला मिळत आहेत. अजित पवार यांनी या जागेवर राष्ट्रवादीचा दावा सांगितल्यानंतर आता या प्रकरणी शिवसेनेचे नेते संजय राऊतांनी प्रतिक्रिया दिली आहे.

पुण्यातील ही जागा काँग्रेसकडे आहे. मात्र ज्याची ताकद जास्त असेल त्याला ही जागा मिळावी असे अजित पवार म्हणाले होते. त्यानंतर आत पुण्यात राष्ट्रवादीची ताकद जास्त आहे. त्यामुळे ही जागा राष्ट्रवादीला देण्यात यावी, अशी भूमिका अजित पवार यांची आहे.

या सगळ्या पार्श्वभूमीवर खासदार संजय राऊत यांनी ट्विट करत प्रतिक्रिया दिली आहे."कसेल त्याची जमीन या प्रमाणे… जो जिंकेल त्याची जागा. हे सूत्र ठरलं तर “कसबा” प्रमाणे पुणे “लोकसभा” पोट निवडणूक महाविकास आघाडीस सहज जिंकता येईल.जागांचा आकडा वाढविण्याचा हट्ट अनाठायी आहे.जिंकेल त्याची जागा याच सूत्राने महाराष्ट्र आणि देश जिंकता येईल. संविधान आणि लोकशाही वाचवण्यासाठी प्रत्येकाने थोडा थोडा त्याग करावाच लागेल! जय महाराष्ट्र!", असे म्हटले आहे.

काँग्रेस नेते देखील या जागेवर दावा सांगत आहेत. काँग्रेसचा हा पारंपारिक मतदारसंघ असून आम्ही येथून पोटनिवडणूक लढवणार असल्याचे काँग्रेसचे नेते मोहन जोशी म्हणाले आहेत. त्यामुळे पुण्याच्या लोकसभा पोटनिवडणूकीपूर्वीच चुरस वाढली आहे.