तळेगाव ढमढेरे - कोव्हिड-१९ या आजाराच्या पार्श्वभूमीवर शाळा बंद असल्या तरी ऑनलाईन व ऑफलाइन पद्धतीने सर्व विद्यार्थ्यांपर्यंत चांगले शिक्षण पोहोचावे या उद्देशाने पुणे जिल्ह्यात जिल्हा शिक्षण व प्रशिक्षण संस्थेमार्फत पुणे जिल्हा परिषद शिक्षण विभाग, पुणे व पिंपरी-चिंचवड महानगरपालिका शिक्षण विभाग आणि लिडरशिप फोर इक्विटी (LFE) या स्वयंसेवी संस्थेच्या सहकार्याने जिल्ह्यातील प्राथमिक व माध्यमिकच्या सर्व शिक्षकांसाठी केंद्रस्तरीय शिक्षण परिषदेचे आयोजन करण्यात आले होते.
- पुण्याच्या बातम्या वाचण्यासाठी येथे ► क्लिक करा
पुणे जिल्ह्यातील सर्व शिक्षक हे शाळा बंद असतानाही सर्व विद्यार्थ्यांपर्यंत पोहोचण्यासाठी त्यांच्या स्तरावर विविध पद्धतीने काम करीत आहेत. त्यांचे हे काम अधिक प्रभावी होऊन शाळा बंद असतानाही सर्व विद्यार्थ्यांचे शिक्षणामधील सातत्य राहण्यासाठी व मुलांचे शिकणे गुणवत्तापूर्ण होण्यासाठी शिक्षकांना सहाय्य व्हावे याउद्देशाने ऑनलाईन केंद्रस्तरीय शिक्षण परिषद नुकतीच झाली.
पुणे जिल्ह्यातील एकूण ३७५ केंद्रावर ही शिक्षण परिषद ऑनलाइन पद्धतीने घेण्यात आल्याची माहिती पुणे जिल्हा शिक्षण व प्रशिक्षण कार्यालयाचे माहिती तंत्रज्ञान विभागाचे प्रमुख डॉ. राजेश बनकर यांनी दिली.
केंद्रस्तरीय शिक्षण परिषद यशस्वी होण्यासाठी या शिक्षण परिषदेपूर्वी जिल्हा स्तरावर "सुलभकांची सुलभीकरण कार्यशाळा" घेण्यात आली होती.
जिल्हा परिषदचे मुख्य कार्यकारी अधिकारी आयुष प्रसाद, जिल्हा शिक्षण व प्रशिक्षण संस्थेच्या प्रमुख डॉ. कमलादेवी आवटे तसेच प्राथमिक शिक्षणाधिकारी सुनील कुऱ्हाडे यांनी उपस्थिताना मार्गदर्शन केले.
'या प्रशिक्षणात गुगल मिटिंग कशी घ्यायची, झूम मिट मिटिंग कशी करायची, ऑनलाईन व ऑफलाईन शिक्षणाची साधने आदी तंत्रज्ञान विषयी मार्गदर्शन करण्यात आले. तशेच यावेळी ऑन लाईन शिक्षणात प्रयोगशील शाळांची यशस्वीता दाखविण्यात आली.'
दोन सत्रात विभागलेल्या कार्यशाळेत जिल्हा शिक्षण प्रशिक्षण कार्यालयाचे सर्व अधिकारी तसेच सुलभक म्हणून नितीन मेमाणे व सचिन ढोबळे यांनी कामकाज पाहिले.
या कार्यशाळेसाठी जिल्ह्यातील केंद्रप्रमुख, तंत्रस्नेही शिक्षक व साधन व्यक्ती असे एकूण सहाशे शिक्षक ऑनलाइन पद्धतीने उपस्थित होते.
Edited By - Prashant Patil
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.