पाटस (पुणे) : दौंड तालुक्यातील पाटस येथे आज (ता. 17) दोन जणांना कोरोना संसर्ग झाल्याचे निष्पन्न झाले आहे. संबधित रुग्णांपैकी साठ वर्षीय व्यक्तीचा मृत्यू झाला आहे. तर, एका महिलेवर उपचार सुरू आहेत, अशी माहिती तालुका आरोग्य अधिकारी डॉ. अशोक रासगे यांनी दिली.

काय सांगता, पुणे झेडपीला डाॅक्टर आणि नर्स मिळेना...

पाटसमधी कोरोनाने मृत्यू झालेल्या व्यक्तीला काल (ता. 16) सकाळी अचानक सर्दी, खोकला, ताप आदीचा त्रास भेडसावू लागला. त्यांनी पाटस येथील खासगी दवाखान्यात उपचार घेतले. त्यानंतर आरोग्य उपकेंद्रातील आरोग्य कर्मचाऱ्यांना संशयित लक्षणे वाटल्याने त्यांना कोरोना तपासणीसाठी पाठविण्यात आले होते. प्रयोगशाळेत घशातील द्रव्याचे नमुने दिले. त्यानंतर ते घरी परतले. आज सकाळी त्यांना पुन्हा त्रास भेडसावू लागला. त्यांनी संबधित खासगी दवाखान्यात धाव घेतली. मात्र, त्यांना पुढील उपचारासाठी दौंड येथे पाठविण्यात आले. त्यानंतर उपचारापूर्वी त्यांचा मृत्यू झाला. हा मृत्यू नेमका कशाने झाला याबाबाबत सर्वच अनभिज्ञ असताना दुपारी प्राप्त झालेल्या प्रयोगशाळेच्या अहवालानुसार त्यांना कोरोनाची बाधा असल्याचे निष्पन्न झाले. संबधित व्यक्तीचा कोरोनाच्या संसर्गाने मृत्यू झाल्याचे तालुका आरोग्य अधिकारी डॉ. रासगे यांनी स्पष्ट केले.

पुणे जिल्ह्यातील अंगणवाडी, शाळा दुरुस्तीसाठी एवढा निधी मंजूर

दरम्यान, गावात आणखीन एका पंचेचाळीस वर्षीय महिलेला देखील कोरोना संसर्ग झाल्याचे दुपारी प्राप्त झालेल्या वैद्यकीय अहवालानुसार निष्पन्न झाले. संबधित महिलेला दोन दिवसांपासून सर्दी, खोकला व तापाची लक्षणे होती. खासगी दवाखान्यात उपचार घेतल्यानंतर काल त्यांना कोरोनाच्या तपासणीसाठी पाठविण्यात आले होते. सध्या महिलेवर बारामती येथे उपचार सुरू आहेत. गावात 2 कोरोना रुग्ण व त्यातील एकाचा मृत्यू झाल्याने एकच खळबळ उडाली आहे. आरोग्य विभागाच्या वतीने रुग्ण सापडलेला भाग काही अंतरापर्यंत सील करण्याचे काम सुरू करण्यात आले, अशी माहिती आरोग्य सेवक भीमराव बडे यांनी दिली.

दरम्यान, कोरोनाचा फैलाव वाढत असल्याच्या पार्श्वभूमीवर लोकांनी विशेष काळजी घ्यावी. घरातून बाहेर पडणे टाळावे, तोंडाला मास्कचा वापर करावा, असे आवाहन आरोग्य सेवक भीमराव बडे व सरपंच संभाजी खडके यांनी केले आहे.

Edited By : Nilesh J. Shende