पुणे - जिवंत देखाव्याचे सादरीकरण, शिवरायांचे मावळे, मर्दानी खेळ, शिवाजी महाराजांच्या वेशातील बालकलाकार, रांजेगावच्या बाबाजी पाटलांवरील जिवंत देखावा, ढोल-ताशा पथकाचा गजर, सनई-चौघड्यांचे मंगलमय सूर अशा पवित्र वातावरणात गुरुवारी (ता. १२) शिवभक्तांनी शिवजयंती उत्साहात साजरी केली.
महाराष्ट्र शाहीर परिषदेतर्फे भवानी पेठेतील भवानीमाता मंदिर येथून सायंकाळी पावणेसहा वाजण्याच्या सुमारास मिरवणूक काढण्यात आली. भवानी मंदिरात शिवरायांची आरती केल्यानंतर भवानी चौकात शिवाजी महाराजांची पालखी आणण्यात आली. येथे ॲड. बाबाजी चव्हाण आणि नगरसेविका मनीषा लडकत यांच्या हस्ते महाराजांच्या पालखीतील पुतळ्याला पुष्पहार अर्पण करून आरती करण्यात आली. या पालखीत शाहीर दादा पासलकर, वैशाली पाटील, राधिका हरिश्‍चंद्रे, शिवछत्रपती पुरस्कार विजेती सोनम मानकर, काशिनाथ दीक्षित, प्रकाश ढवळे आदी सहभागी झाले होते. या पालखी मिरवणुकीत सुमारे आठ ते दहा मंडळे सहभागी झाली होती. नाना पेठेतील देशप्रेमी मित्रमंडळाने रांजेगावचा बाबाजी पाटील देखावा, हिंदमाता शिवजयंती उत्सव मंडळाने काशी विश्‍वनाथाचा देखावा सादर केला.
‘जय भवानी, जय शिवाजी, छत्रपती शिवाजी महाराजांचा विजय असो’ अशी घोषणाबाजी करत पारंपरिक पोशाखात उपस्थित महिला आणि मुले मोठ्या संख्येने सहभागी झाली होती. या वेळी महाराजांना पोवाड्यांमधून मानवंदना देण्यात आली. शिवरायांच्या पुतळ्यावर पुष्पवृष्टीही करण्यात आली.
दरम्यान, शिवसेना पुणे शहर शाखेतर्फे नाना पेठेपासून लाल महालापर्यंत मिरवणूक काढण्यात आली. छत्रपती शिवाजी महाराज यांची कोकणस्वारी आणि औरंगजेब हा जिवंत देखावा सर्वांचेच लक्ष वेधून घेत होता. शिवसेना सहसंपर्कप्रमुख अजय भोसले, शहरप्रमुख संजय मोरे, अभय वाघमारे, प्रशांत बधे, डॉ. अमोल देवळेकर, नगरसेविका पल्लवी जावळे आदींसह शेकडो शिवसैनिक या मिरवणुकीत सहभागी झाले होते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.