पुणे - दिवाळीतील फटाक्‍यांचा आवाज मागील चार वर्षांच्या तुलनेत यंदा कमी झाल्याचे महाराष्ट्र राज्य प्रदूषण नियंत्रण मंडळाच्या (एमपीसीबी) आकडेवारीतून स्पष्ट होत आहे. दिवाळीचा पहिला दिवस, लक्ष्मीपूजन आणि भाऊबीज या तीन दिवसांमध्ये शहरातील आवाजाची पातळीचे निरीक्षण ‘एमपीसीबी’तर्फे करण्यात आली आहे. लक्ष्मीपूजनाच्या दिवशी रात्री पुणेकरांनी प्रदूषणाची दिवाळी साजरी केल्याचेही या आकडेवारीतून दिसत आहे.  

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

सामान्यतः सकाळी सहा ते रात्री दहा वाजेपर्यंत आवाजाची पातळी ६५ डेसिबल तर रात्री दहा ते सकाळी सहा वाजेपर्यंत ५५ डेसिबल असणे आवश्‍यक असल्याचे ‘एमपीसीबी’ने निश्‍चित केले आहे. त्यानुसार यंदा पुण्यात लक्ष्मीपूजनादिवशी सकाळी सहा नंतर शहरातील आवाजाची पातळी ७६ डेसिबल तर रात्री दहानंतर ६६.४ डेसिबल इतकी नोंद झाली आहे. 

पुणे ते जयपूर व्हाया कोल्हापूर; पुणे पोलिस पाषाणकरांपर्यंत कसे पोचले?

कोरोनामुळे प्रशासनामार्फत फटाक्‍यांशी संबंधित काही निर्बंध लावण्यात आले होते. फटाक्‍यांचा कमी वापर करण्याची नागरिकांची मानसिकता दिसून आली. भारतीय उष्णकटीबंधीय हवामानशास्त्र संस्थेच्या (आयआयटीएम) माहितीनुसार, लक्ष्मीपूजनाच्या दुसऱ्या दिवशी शहरातील हवेची गुणवत्ता मध्यम श्रेणीवरून घसरत ‘खराब’वर पोचली होती. त्यामुळे फटाक्‍यांचा वापर कमी झालेला नसून यामध्ये केवळ आवाज करणाऱ्या फटाक्‍यांची संख्या कमी असल्याचे समजू शकते. शहराच्या तुलनेत दिवाळीच्या पहिल्या व दुसऱ्या दिवशी पिंपरी-चिंचवड येथील ध्वनी प्रदूषण कमी नोंदले गेले. 

व्यावसायिक गौतम पाषाणकर का निघून गेले? वाचा सविस्तर

नांदेडमध्ये सर्वांत कमी प्रदूषण
राज्यात यंदा सर्वांत कमी ध्वनी प्रदूषणाची नोंद नांदेड येथे झाली. नांदेड येथे लक्ष्मीपूजन दिवशी सकाळी सहा ते रात्री दहा वाजेपर्यंत ६३.२ तसेच रात्री दहा ते सकाळी सहा वाजेपर्यंत ५४.३ डेसिबल इतके नोंदले गेले. ही पातळी ‘एमपीसीबी’च्या मानकांनुसार कमी असल्याचे आढळले.

Edited By - Prashant Patil