पुणे : तुम्ही बारावीत आहात का आणि बोर्डाच्या परीक्षेची तयारी करत आहात का! अहो, मग जरा इकडे लक्ष द्या. तुम्हाला आता येत्या शनिवारपासून (ता.३) तुमचे प्रवेशपत्र (हॉल तिकिट) कनिष्ठ महाविद्यालयामार्फत मिळू शकणार आहे. होय, महाराष्ट्र राज्य माध्यमिक व उच्च मध्यमिक शिक्षण मंडळातर्फे एप्रिल- मे २०२१ मध्ये घेण्यात येणाऱ्या बारावीच्या परीक्षेची प्रवेशपत्र (हॉल तिकिट) येत्या शनिवारपासून विद्यार्थ्यांना ऑनलाइन पद्धतीने उपलब्ध करून देण्याचा निर्णय घेतला आहे. विद्यार्थ्यांना कनिष्ठ महाविद्यालयांमार्फत ही प्रवेशपत्र मिळणार आहेत. 

राज्य मंडळाच्या सर्व विभागीय मंडळातील सर्व विद्यार्थ्यांना ऑनलाइन प्रवेशपत्र उपलब्ध करून देण्यात येत आहेत. मंडळाच्या ‘www.mahahsscboard.in’ या संकेतस्थळावर विद्यार्थ्यांची प्रवेशपत्र कॉलेज लॉगिनमध्ये डाऊनलोड करण्यासाठी उपलब्ध होणार आहेत. या बाबत काही तांत्रिक अडचण उद्‌भवल्यास विभागीय मंडळाकडे संपर्क साधावा, असे आवाहन राज्य मंडळाचे सचिव डॉ. अशोक भोसले यांनी केले आहे. 

खेड-शिवापूर टोल नाक्यावरून प्रवास करताय, मग ही बातमी नक्की वाचा
 
प्रवेशपत्र उपलब्ध करून देण्यासंदर्भात सूचना : 
- सर्व विभागीय मंडळाच्या कार्यकक्षेतील सर्व कनिष्ठ महाविद्यालयांनी ऑनलाइन प्रवेश पत्रे पिंट करून विद्यार्थ्यांना द्यावीत. 
- प्रवेशपत्र ऑनलाइन पद्धतीने प्रिटिंग करताना विद्यार्थ्यांकडून त्यासाठी कोणतेही वेगळे शुल्क घेऊ नये. 
- प्रवेशपत्राची प्रिंट काढून त्यावर मुख्याध्यापकांचा किंवा प्राचार्यांचा शिक्का मारून स्वाक्षरी करावी. 
- प्रवेशपत्रामध्ये विषय, माध्यम बदल असतील, तर त्यातील दुरूस्ती कनिष्ठ महाविद्यालयांनी विभागीय मंडळात जाऊन करून घ्यायची आहे. 
- प्रवेशपत्रावरील फोटो, स्वाक्षरी, विद्यार्थ्यांचे नाव यासंदर्भात दुरूस्त्या असल्यास महाविद्यालयांनी त्यांच्या स्तरावर करून त्यांची एक प्रत विभागीय मंडळाकडे त्वरीत पाठवावी. 
- प्रवेश पत्र विद्यार्थ्यांकडून गहाळ झाल्यास संबंधित कनिष्ठ महाविद्यालयांनी पुन्हा पिंट काढून त्यावर लाल शाईने ‘द्वितीय प्रत’ असा शेरा देऊन विद्यार्थ्यांना प्रवेशपत्र द्यावे. 
- फोटो सदोष असल्यास त्यावर विद्यार्थ्यांचा फोटो चिकटवून त्यावर संबंधित मुख्याध्यापक/प्राचार्य यांनी शिक्का मारून स्वाक्षरी करावी.
 

पुण्यातील २० टक्के हॉटेल पुन्हा बंद