पिंपरी - ‘अपार मेहनतीच्या बळावरच युवकांनी आयुष्यात यश मिळवावे. तरुण वयातच व्यक्ती घसरते आणि सावरतेही. त्यासाठी जीवनात करिअरवर फोकस असला पाहिजे. आयुष्यात स्वतःला सिद्ध करायचे असेल तर बाह्यसौंदर्यापेक्षा बौद्धिक सौंदर्य वाढविण्याची गरज आहे,’’ असा सल्ला निगडीचे वरिष्ठ पोलिस निरीक्षक सुनील टोणपे यांनी विद्यार्थ्यांना दिला.

ताज्या बातम्यांसाठी डाऊनलोड करा ई-सकाळचे ऍप

निगडीतील डॉ. अरविंद ब. तेलंग कला, विज्ञान व वाणिज्य वरिष्ठ महाविद्यालयातील वालचंद संचेती सभागृहात ‘सकाळ यिन संवाद’ घेण्यात आला. प्राचार्य डॉ. प्रकाश पाटील, समाजशास्त्र विभागप्रमुख विकास शेवाळे, पोलिस शिपाई विकास दराडे, धनंजय जाधव उपस्थित होते. 

टोणपे म्हणाले, ‘‘तरुणाईला मोबाईलचे व्यसन लागले आहे. अनेकदा रस्त्याने चालत असतानाही तरुणांना मोबाइलमुळे भान राहत नाही. त्यामुळेच गुन्हेगारीही वाढताना दिसत आहे. याला वेळेत आळा घालणे आवश्‍यक आहे. आयुष्यात तरुण-तरुणींनी फॅशन करावी; पण याला मर्यादा हवी. अंगप्रदर्शन करण्यात धन्यता मानण्यापेक्षा भारतीय संस्कृती जपण्यात समाधान माना. तसेच महिलांनी स्वतःवर होणाऱ्या अन्यायविरोधी अधिक आक्रमक व्हावे. धाडस अधिक वाढवावे. आरोग्य जपावे. कोणत्याही प्रलोभनांना बळी पडू नका. आई-वडिलांच्या संस्काराची किंमत ठेवा. आयुष्यात कमावलेली गुन्हेगारी स्वरूपातील संपत्ती ही आसुरी संपत्ती आहे.’’ 

कार्यक्रमाचे संयोजन अनुप द्विवेदी यांनी केले. प्रा. डॉ. शिवाजी शेळके यांनी सूत्रसंचालन केले.