पुणे :  टिकटॉक स्टार पूजा चव्हाण मृत्यूचे गुढ अद्याप समोर आले नाही, दरम्यान या प्रकरणात पुणे पोलिसांच्या पथकाने दोघांना ताब्यात  घेतले आहे. दरम्यान, ताब्यात घेतलेल्या व्यक्तींपैकी एक जण अरुण राठोड याच्या जवळील व्यक्ती असल्याची माहिती मिळत आहे.  दरम्यान, या प्रकरणाची गांभिर्याने दखल घ्यावी यासाठी राष्ट्रीय महिला आयोगाने पुणे पोलिसांना पत्र पाठविले होते. 

आणखी वाचा - पूजा चव्हाणच्या मोबाईलमध्ये दडलंय काय?

पूजा चव्हाण हिने काही दिवसांपूर्वी वानवडी येथील हेवन पार्क या सोसायटीच्या पहिल्या मजल्यावरील सदनिकेच्या गॅलरीतून उडी मारून आत्महत्या केली होती. या प्रकरणामध्ये महाआघाडीतील एका मंत्र्याचे नाव जोडले गेल्याने त्यावरुन मोठ्या प्रमाणात राजकीय आरोपांच्या फैरी झडल्या. दरम्यान, काही व्यक्तींनी संबंधीत प्रकरणाबाबत राष्ट्रीय महिला आयोगाला ट्‌विटरद्वारे कळवून त्यामध्ये लक्ष घालण्याची विनंती केली होती. त्यानुसार या प्रकरणामध्ये राष्ट्रीय महिला आयोगाच्या अध्यक्षा रेखा शर्मा यांनी स्वतः लक्ष घालत पुणे पोलिसांना या प्रकरणाचा आत्तापर्यंत काय तपास केला, याबाबतचा चौकशी अहवाल तत्काळ पाठविण्याचे आदेश पुणे पोलिसांना दिले होते.

आणखी वाचा - पूजा चव्हाणच्या हत्येचा कट? भाडेकरारापासून आत्महत्येचा घटनाक्रम काय सांगतो?

दरम्यान आज यवतमाळ आणि परळीत गेलेल्या पुणे पोलिसांच्या पथकाने दोघांना ताब्यात घेतले आहे. बेपत्ता अरुण राठोड याला शोधण्यासाठी पोलिसांचे प्रयत्न सुरू आहे.