आळेफाटा, ता. ३० ः आळे व बोरी बुद्रुक या दोन गावांना जोडणाऱ्या कुकडी डावा कालव्यावर असलेल्या पुलाची दुरुस्ती होणार कधी असा प्रश्न या परिसरातील नागरिकांना पडला आहे. येथील पुलाची दुरवस्था झाली असून या पुलावरून वाहतूक करणे धोक्याचे असून या पुलाच्या खालच्या बाजूने स्लॅब निघायला सुरुवात झाली आहे. या पुलावरून नेहमीच जड वाहने ये-जा करत असतात. त्वरित या पुलाची दुरुस्ती न झाल्यास या ठिकाणी मोठा अपघात होण्याची शक्यता आहे. सार्वजनिक बांधकाम विभागाने याकडे त्वरित लक्ष देवून येथील काम करणे गरजेचे आहे.
या पुलाच्या कामाला जवळपास तीस वर्षे झालेले आहे. येथील पुलाची त्वरित दुरुस्ती करावी अन्यथा आंदोलन करू असा इशारा येथील ग्रामस्थांनी दिला आहे.