बारामती, ता. १२ : नगरपरिषदेच्या निवडणुकीसाठी उमेदवारी अर्ज दाखल करण्याच्या तिसऱ्या दिवशीही (ता. १२) एकाही उमेदवाराने आपला अर्ज दाखल केला नसल्याची माहिती नगरपरिषद सूत्रांनी दिली. सलग तिसऱ्या दिवशीही निवडणुकीशी संबंधित कर्मचारी उमेदवारांची वाट बघत बसलेले पाहायला मिळाले.
बारामती नगरपरिषद निवडणुकीसाठी उमेदवारी अर्ज दाखल करण्याच्या पहिल्या तीन दिवसात एकही अर्ज दाखल झालेला नाही. राष्ट्रवादी कॉंग्रेसकडून निवडणूक लढविण्यास इच्छुक असलेल्या उमेदवारांना उपमुख्यमंत्री अजित पवार यांनी गुरुवारपर्यंत थांबण्यास सांगितलेले आहे. त्यामुळे राष्ट्रवादीकडून कोणीही अर्ज दाखल केलेला नाही. शुक्रवारपासून उमेदवारी अर्ज दाखल करण्यास प्रारंभ होईल, अशी अपेक्षा व्यक्त होत आहे. बहुजन समाज पक्षाच्या वतीने महासचिव काळूराम चौधरी हे शुक्रवारी आपला नगराध्यक्षपदासाठीचा अर्ज दाखल करणार आहेत.