जेजुरी, ता. २ : जेजुरीत दर्शनासाठी आलेल्या भाविकांनी नंदी चौकातील महादेव श्रीरंग वाघमारे (वय ३५) या भंडारा-खोबरे विकणाऱ्या दुकानदाराला चप्पल काढण्याच्या कारणावरून भाविकांनी दुकानात शिरून काठ्यांनी बेदम मारहाण केली. दुकानाचे मोठे नुकसान केले.

शनिवारी व रविवारी खंडोबा दर्शनासाठी भाविकांची मोठी गर्दी असते. जेजुरी शहरातील नदी चौक येथे अज्ञात पाच ते सहा जणांनी ‘दुकानासमोर पायातील चप्पल काढू नका’, असे दुकानदाराने म्हणाल्याच्या कारणावरून शिवीगाळ करीत मारहाण केली. या पाच ते सहा जणांनी तेथे आजूबाजूला पडलेले लाकडी बांबू हातात घेऊन दुकानात शिरून मारहाण केली. दुकानाची तोडफोड करण्यात आली. भंडारा-खोबऱ्याचे भरलेले भांडे, पेढ्याचे पदार्थ पायाने हाताने फेकून देवून नुकसान केले. दुकानात शिरून फिर्यादी व इतरांना लाकडी बांबूने जोरजोरात मारहाण केली. फिर्यादी महादेव वाघमारे हे जखमी झाले आहेत. लाकडी दांडक्याने दार तोडण्याचा प्रयत्न केला. दार न तुटल्याने आत लपून बसलेले कामदार बचावले. महादेव श्रीरंग वाघमारे यांनी फिर्याद दिली आहे. पाच ते सहा अज्ञात भाविकांच्या विरोधात गुन्हा दाखल करण्यात आला आहे.