शिक्रापूर, ता. १६ : मुखई (ता. शिरूर) येथील संपूर्ण कुटुंब लग्नासाठी बाहेरगावी गेल्याची संधी साधून घराचे कुलूप तोडून तब्बल वीस तोळे सोन्याच्या दागिन्यांसह चांदीचे दागिने व रोकड चोरी करणाऱ्या दोन परप्रांतीय सराईत चोरट्यांना शिक्रापूर पोलिसांनी नुकतेच पकडले.
याबाबत शिक्रापूर पोलिसांनी माहिती दिली की, मुखई येथील मंगल रामचंद्र आरळेकर (वय ६६) या काही दिवसांपूर्वी आपल्या संपूर्ण कुटुंबियांसह एका लग्नासाठी बाहेरगावी गेलेल्या असताना चोरट्यांनी घराच्या दरवाजाचे कुलूप व किचनच्या खिडकीचे गज तोडून घरात प्रवेश केला. घरातील कपाटातून चोरट्यांनी वीस तोळे वजनाचे सोन्याचे दागिने, काही चांदीचे दागिने, रोख पन्नास हजार रुपये व एक टिव्ही संच चोरुन नेला. याबाबत मंगल आरळेकर यांनी शिक्रापूर पोलीस ठाण्यात फिर्याद दिली. त्यावरून पोलिसांनी अज्ञात चोरट्यांवर गुन्हा दाखल करुन तपासही तत्काळ सुरु केला. या गुन्ह्यातील काही सराईत आरोपींची माहिती शिक्रापूर पोलिसांना सीसीटीव्हीच्या माध्यमातून मिळाली. पोलिसांनी संशयित आरोपींचा शोध सुरू केला व त्यातील एक संशयित कपिल राजपूत हा तळेगाव ढमढेरे (ता. शिरूर), तर वेद राजपूत हा आपटी (ता. शिरूर) परिसरात असल्याची माहिती मिळाली. त्यानुसार पोलीस उपनिरीक्षक महेश डोंगरे, पोलीस हवालदार श्रीमंत होनमाने, विकास पाटील, रोहिदास पारखे, अमोल दांडगे, राम जाधव, जयराज देवकर, अमोल नलगे, स्थानिक गुन्हे शाखेचे सागर धुमाळ यांनी तळेगाव ढमढेरे येथे जाऊन कपिल मनोरीया राजपूत (वय २६, सध्या रा. वाजेवाडी, ता. शिरूर) व आपटी येथील नदी काठाहून वेद संजीत राजपूत (वय २५, रा. पाथरगाव कामशेत, ता. मावळ) या दोघांना मोठ्या शिताफीने पकडले. चौकशी केली असता दोघांनीही त्यांच्या तीन साथीदारांच्या मदतीने आरळेकर यांच्या इथे चोरी केल्याची कबुली दिली. पुढील तपास पोलीस उपनिरीक्षक विजय मस्कर करीत आहेत.