नारायणगाव (पुणे) : जुन्नर कृषी उत्पन्न बाजार समितीच्या नारायणगाव येथील टोमॅटो उपबजारात आज तीस हजार टोमॅटो क्रेटची आवक झाली. प्रतवारी नुसार टोमॅटो क्रेटला (वीस किलो) २०० रुपये ते ३३० रुपयांच्या दरम्यान भाव मिळाला. या हंगामात टोमॅटोला मिळालेला हा उच्चांकी बाजारभाव असून, आज क्रेटमागे सुमारे दिडशे रुपयांची वाढ झाली आहे. टोमॅटो खरेदी विक्रीतून आज उपबजारात सुमारे ७५ लाख रुपयांची उलाढाल झाली आहे, अशी माहिती सभापती संजय काळे यांनी दिली.

पुणे- मुळशी प्रवास करताय? सावधान..

कोरोनाचा संसर्ग टाळण्यासाठी मागील दोन महिने जुन्नर कृषी उत्पन्न बाजार समितीचे सर्व उपबजार बंद ठेवले होते. या संधीचा फायदा घेऊन व्यापाऱ्यांनी शेतमालाची मातीमोल भावाने बांधावर खरेदी केली. त्यामुळे शेतकऱ्यांचे कोट्यवधी रुपयांचे नुकसान झाले आहे. सोशल डिस्टन्सिंगची काळजी घेऊन २८ मेपासून संचालक मंडळाने नारायणगाव, जुन्नर, ओतूर, आळेफाटा, बेल्हे उपबजार सुरू करण्याचा निर्णय घेतला. त्यामुळे टोमॅटो, फ्लॉवर, मिरची, वालवड, कोथिंबीर, मेथी आदी भाजीपाल्याच्या बाजारभावात कालपासून दुप्पट ते तिप्पट वाढ झाली आहे. 

मोटार विहिरीत कोसळून महिलेसह दोन बालकांचा मृत्यू

ओतूर भाजीपाला उपबजारात काल २ हजार ३२९  डागांची आवाक झाली. नारायणगाव बाजारात मेथी, कोथिंबिरीच्या दीड लाख जुड्याची आवक झाली. कोथिंबीर, मेथीच्या जुडीला प्रतवारीनुसार शेकडा अनुक्रमे ८०० रूपये ते २६०० रुपये वाढ, १०० रूपये ते १७०० रुपये भाव मिळाला. नुकत्याच झालेल्या चक्री वादळाने फळ भाजीपाला पिकांचे मोठे नुकसान झाले. त्यामुळे मागील वर्षाच्या तुलनेत आवक कमी होत आहेत. 

उरुळी कांचनमधील महिला राजकीय पदाधिकारी कोरोना पाॅझिटिव्ह

नारायणगाव टोमॅटो उपबजारात पन्नास व्यापारी दाखल झाले असून, येथून रोज सुमारे चाळीस ट्रकमधून मुंबई, गुजरात, राजस्थान, मध्यप्रदेश भागात टोमॅटो विक्रीसाठी रवाना होत आहेत. टोमॅटोचे झालेले नुकसान पाहता बाजारभावात वाढ होण्याची शक्यता आहे. त्यामुळे शेतकऱ्यांनी पिकाची काळजी घ्यावी, असे आवाहन संचालक निवृत्ती काळे, सह सचिव शरद घोंगडे यांनी केले आहे.