जुन्नर : राळेगण (ता. जुन्नर) येथे ट्रॅक्टरने शेतात काम करत असताना झालेल्या अपघातात वडील व मुलाचा मृत्यू झाला. ही दुर्देवी घटना शनिवारी (ता. १७) रोजी दुपारी घडली. या घटनेमुळे राळेगण गावावर शोककळा पसरली असून परिसरात हळहळ व्यक्त करण्यात येत आहे.

कल्याण जि. ठाणे येथील महात्मा फुले चौक पोलीस ठाण्याचे पोलीस कर्मचारी सोपान उंडे, (वय ५६) सुट्टी घेऊन कुटुंबासह राळेगण येथे आपल्या गावी आले होते. नुकताच पाडव्याच्या दिवशी त्यांनी नवीन ट्रॅक्टर खरेदी केला होता. शनिवारी दुपारच्या वेळेस सोपान उंडे व त्यांचा मुलगा तेजस (वय २०) व घंगाळदरे येथील ट्रॅक्टर चालक संदेश तळपे यास घेऊन शेती मशागत करत होते. एका शेतात रोटर मारून झाल्यानंतर दुसऱ्या शेतात जात असताना तीव्र उभी चढण व जागेवरील वळण यामुळे चालकाचे तळपे ट्रॅक्टर वरील नियंत्रण सुटले व ट्रॅक्टर थेट वीस फूट खोल असलेल्या शेतात पडला. ट्रॅक्टरने एक पलटी मारुन पुन्हा उभा झाला. यावेळी ट्रॅक्टरचे हूड चेपले ट्रॅक्टरवर बसलेले सोपान उंडे व चालक तळपे त्यात अडकले तर मुलगा तेजस जमिनीवर पडला. गंभीर जखमी झालेल्या तळपे याने ट्रॅक्टरच्या हुडातुन सुटका करून आरडाओरडा केला. त्याच्या घंगाळदरे गावातील लोकांना फोन करुन बोलावले. घंगाळदरे व राळेगण येथील लोक मदतीसाठी पोहचले. मात्र तोपर्यत सोपान उंडे ट्रॅक्टरच्या हुडात अडकून जागीच मृत झाले होते.

तेजस व तळपे यांना उपचारार्थ दवाखान्यात नेत असताना रस्त्यातच तेजस मरण पावला. तळपे यांची प्रकृती चिंताजनक असून त्यांच्यावर उपचार सुरू आहेत. दरम्यान, ट्रॅक्टर हा छोटा असून त्याला जोडलेल्या रोटरच्या वजनामुळे ट्रक्टरचे वळणावर नियंत्रण सुटून हा अपघात झाला असावा असा अंदाज वर्तवण्यात येत आहे. पुढील तपास जुन्नर पोलीस करत आहेत.