पाटस ः पुणे-सोलापूर महामार्गावर पाटस (ता. दौंड) येथे तीन वाहनांच्या विचित्र अपघातात कुरकुंभ औद्योगिक वसाहतीमधील एका कंपनीतील दोन प्रवासी कामगांराचा मृत्यू झाला. तर दोन कामगार जखमी झाले. बुधवारी (ता. १९) सायंकाळी सहा वाजता ही घटना घडली. योगेश मुसमाडे (वय ४०) रा. मांजरी, पुणे, ओमप्रकाश यादव (वय ५५) रा. हडपसर पुणे असे मृत झालेल्या कामगारांची नावे आहेत. तर हिमेश चव्हाण (वय ४५) रा. हडपसर, मनोहर बंडगर (वय ४२) रा. दौंड हे जखमी झाले आहेत.

याबाबत पोलिसांनी माहिती दिली. दौंड तालुक्यातील कुरकुंभ औद्योगिक वसाहतीमधील एका कंपनीतील एक बस ही कामगारांना घेवून महामार्गाने पुण्याकडे चालली होती. सायंकाळी सहा वाजता पाटस घाटात बसच्या पाठीमागून येणाऱ्या एका मालवाहतूक टेंम्पोने पुढे जाण्याचा प्रयत्न केला. यावेळी टेम्पो चालक व बस चालक यांच्यात काही कारणास्तव चालू प्रवासातच वाद झाला. वैतागलेल्या बस चालकाने काही अंतर पुढे जावून पाठीमागून येणाऱ्या टेम्पोला थांबविले. यावेळी पुन्हा दोन चालकांमध्ये बाचाबाची सुरु झाली. हा प्रकार सुरु असतानाच पाठीमागून येणाऱ्या एका मालवाहतूक ट्रकने रस्त्यात उभ्या असणाऱ्या बस व टेम्पोला जोराची धडक दिली. या तीन वाहनांच्या विचित्र अपघातात बसमधील योगेश मुसमाडे या कामगाराचा जागीच मृत्यू झाला. तर इतर तीन कामगार जखमी झाले.

माहिती मिळताच यवत पोलिस ठाण्याचे पोलिस निरीक्षक भाऊसाहेब पाटील, पाटस चौकीचे पोलिस उपनिरीक्षक संजय नागरगोजे, पोलिस नाइक दशरथ कोळेकर, हनुमंत खडके, सोनबा देशमुख आदींनी घटनास्थळी धाव घेतली. रुग्णवाहिकेस पाचारण करण्यात आले. मृत कामगारास तत्काळ शवविच्छेदनासाठी पाठवून दिले. तर गंभीर जखमींना तत्काळ उपचारासाठी खासगी दवाखान्यात दाखल करण्यात आले. उपचारदरम्यान रात्री उशिरा ओमप्रकाश यादव यांचा मृत्यू झाला. दोन कामगारांवर उपचार सुरु असून, त्यांची प्रकृती स्थिर असल्याचे समजते. दरम्यान, दोन्ही वाहनांना धडक देणाऱ्या ट्रक चालकास ताब्यात घेण्यात आले असल्याची माहिती पोलिस उपनिरीक्षक संजय नागरगोजे यांनी सांगितले.