वाघोली: वाघोली येथील बी. जे. एस. लसीकरण केंद्रावर लसीचा साठा संपला आहे. यामुळे आज नागरिकांना लसीकरणा विना परतावे लागले. येथील केंद्रावर शनिवार पर्यंत 3489 नागरिकांचे लसीकरण करण्यात आले. त्यातील 690 नागरिकांचे दोन्ही डोस पूर्ण झाले आहेत. वाघोलीसह अन्य गावातील नागरिकही लसीकरणासाठी वाघोली केंद्रावर येतात. वाघोलीत कोरोना रुग्णांचा एकूण आकडा 3247 झाला आहे. त्यापैकी 3069 रुग्ण ठणठणीत बरे झाले आहेत. सध्या 147 रुग्ण ऍक्टिव्ह आहेत. तर 31 जणांचा मृत्यू झाला आहे.
 

1 मार्च पासून दररोज कोरोना रुग्णात दोन आकडी संख्येने वाढ होत आहे. बरे होणाऱ्यांची टक्केवारी 95 टक्के आहे. वाढत्या कोरोनामुळे केंद्रावर लस घेण्यासाठी गर्दी होत आहे. वाघोली प्राथमिक केंद्रा अंतर्गत येणाऱ्या पाच गावात एकूण 17850 लाभार्थी आहेत. त्यातील 10853 लाभार्थी हे जेष्ठ नागरिक आहेत. तर अन्य जणांना इतर आजार आहे.

हेही वाचा - कोरोना लसीमुळे रक्तात गुठळ्या; जगभरात भीती आणि गोंधळ

हेही वाचा - NEET 2021 : मेडिकल प्रवेश परीक्षेच्या तारखा जाहीर 

''साठवणूक केंद्रातच लस शिल्लक नसल्याने ती उपलब्ध होऊ शकली नाही. सायंकाळ पर्यंत लस उपलब्ध होण्याची शक्यता आहे'' अशी माहिती तालुका आरोग्य अधिकारी डॉ सचिन खरात यांनी दिली. लसीचा तुटवडा होऊ देऊ नये तसेच त्वरित लस उपलब्ध करून द्यावी अशी मागणी नागरिक करीत आहेत.